واشنگٹن: اردن میں 3 فوجیوں کی ہلاکت پر امریکی صدر کا سخت رد عمل آ گیا، جو بائیڈن نے کہا کہ امریکا اردن میں امریکی فوجیوں کی ہلاکت کا ضرور جواب دے گا۔
غیر ملکی میڈیا رپورٹس کے مطابق اتوار کو امریکی صدر بائیڈن نے کہا کہ امریکا اردن میں تین فوجیوں کی ہلاکت کا ضرور جواب دے گا اور اس کے لیے ’’وقت اور طریقہ کار کا تعین ہم خود کریں گے۔‘‘
انھوں نے کہا گزشتہ روز ہمیں مشرقِ وسطیٰ میں مشکل دن کا سامنا کرنا پڑا، شام کی سرحد کے قریب شمال مشرقی اردن میں فوجی اڈے پر تعینات امریکی افواج پر بغیر پائلٹ کے ڈرون حملے میں امریکا نے تین بہادر فوجیوں کو کھو دیا، صدر نے حملے کا ذمہ دار ایران کے حمایت یافتہ گروپ کو قرار دیا۔
اردن کے ڈرون حملے میں 3 امریکی فوجی ہلاک
میڈیا رپورٹس میں کہا گیا ہے کہ اسرائیل اور حماس کی غزہ میں جاری جنگ کے دوران مشرق وسطیٰ میں متاثر گروپوں نے گزشتہ کئی ماہ میں امریکی فورسز پر حملے کیے ہیں، لیکن ایسا پہلی بار ہے کہ کسی حملے میں امریکی فوجی ہلاک ہوئے ہیں۔
روئٹرز کے مطابق امریکی سینٹرل کمانڈ نے کہا ہے کہ ابتدائی معلومات کے مطابق حملے میں کم از کم 34 اہلکار زخمی ہوئے ہیں، تاہم اس تعداد میں تبدیلی ہو سکتی ہے۔ دو امریکی حکام نے بتایا کہ ڈرون نے صبح سویرے بیرکوں کے قریب حملہ کیا، جس سے متاثرین کی تعداد کا اندازہ لگایا جا سکتا ہے۔
