اسلام آباد: قومی اسمبلی کی مدت میں 6 ماہ توسیع کی تجویز سامنے آئی ہے۔
تفصیلات کے مطابق پیپلز پارٹی کے ذرائع نے دعویٰ کیا ہے کہ جمعیت علمائے اسلام (ف) نے مسلم لیگ ن کو قومی اسمبلی کی مدت میں چھ ماہ توسیع کی تجویز دی ہے۔
ذرائع کے مطابق مسلم لیگ ن قومی اسمبلی کی مدت میں توسیع کی حامی ہے، تاہم یہ تجویز پاکستان پیپلز پارٹی کے ساتھ شیئر نہیں کی گئی ہے، جب کہ پی پی کا اسمبلی مدت میں توسیع کے معاملے پر مؤقف واضح ہے۔
ذرائع نے بتایا کہ پیپلز پارٹی اسمبلی مدت میں توسیع کی بھرپور مخالفت کرے گی، کیوں کہ وہ سمجھتی ہے کہ انتخابات میں تاخیر ملک، سیاست، اور معیشت کے مفاد میں نہیں ہے، صرف بروقت انتخابات ہی سے ملکی سیاست اور معیشت مستحکم ہوگی۔
پیپلز پارٹی اگست کے دوسرے ہفتے میں قومی اسمبلی کی تحلیل کی خواہش مند ہے، اور وہ مقررہ وقت سے قبل اسمبلی تحلیل کی بھی حمایت کرے گی، مقررہ وقت سے قبل اسمبلی کی تحلیل پر انتخابات 90 روز میں ہوں گے۔