کراچی: جمعیت علمائے اسلام کے رہنما حافظ حسین احمد نے مریم نواز کی نیب میں پیشی کو پی ڈی ایم کا ’عورت مارچ‘ قرار دے دیا۔
اے آر وائی نیوز کی رپورٹ کے مطابق جمعیت علمائے اسلام کے رہنما حافظ حسین احمد کا کہنا ہے کہ پی ڈی ایم رینٹل مارچ کی منسوخی کے بعد مریم کی نیب میں پیشی کے دوران 26 مارچ کو عورت مارچ کرے گی۔
حافظ حسین احمد نے کہا کہ عورت مارچ کا ایجنڈا وہی رینٹل مارچ کا ایجنڈا ہے، مارچ کا ایجنڈا کرپشن بچاؤ ہے اور اس کی منزل نیب کا ادارہ ہے۔
جے یو آئی رہنما نے کہا کہ پی ڈی ایم کی قیادت کے بقول نیب پیشی پر لاکھوں کارکنان ساتھ ہوں گے، ان لاکھوں کارکنوں میں سے اکثریت سے ’سلیمانی ٹوپی‘ پہنی ہوگی۔
انہوں نے کہا کہ آزادی مارچ کی ناکامی سے استعفوں تک ہمارا موقف سچ ثابت ہوا، رینٹل مارچ کی منسوخی تک ہمارے موقف کا ایک ایک لفظ سچ ثابت ہوا ہے۔
مزید پڑھیں: ’’یکم تاریخ سے پہلے ہی پی ڈی ایم کو سیاسی ’اپریل فول‘ کا سامنا کرنا پڑا‘‘
حافظ حسین احمد نے کہا کہ پی ڈی ایم کی تمام کوششیں کرپٹ مجرموں کو بچانے کی ناکام کوشش ہے، ملک کی لوٹی ہوئی دولت کو لندن کے پناہ گزین بے دریغ استعمال کررہے ہیں۔
جے یو آئی رہنما نے کہا کہ نظریاتی بننے والا مشرف سے لے کر آج تک تین این آر او لے چکا ہے اور چوتھے این آر او کی تیاری میں ہے۔
