اسلام آباد: کراچی کے صارفین کے لیے بجلی ایک ساتھ سستی اور مہنگی ہونے کا امکان ہے۔
تفصیلات کے مطابق کے الیکٹرک نے ایک ماہ کے لیے فی یونٹ قیمت میں 7 روپے 4 پیسے کمی کی درخواست کی ہے، دوسری طرف وفاقی حکومت نے بھی کراچی کے لیے بجلی مہنگی کرنے کی درخواست کر دی ہے۔
کے الیکٹرک نے نومبر کے ایف سی اے کی مد میں نیپرا میں درخواست دائر کی ہے، جب کہ وفاقی حکومت کی جانب سے کے الیکٹرک کے لیے بجلی 3 روپے 21 پیسے فی یونٹ مہنگی کرنے کی درخواست کی گئی ہے۔
ادھر نومبر کی ماہانہ فیول ایڈجسٹمنٹ کی مد میں ملک بھر میں بجلی 20 پیسے مہنگی ہونے کا امکان ہے، ایک ماہ کے لیے بجلی کی قیمت میں اضافے کی درخواست پر نیپرا میں سماعت آج ہوگی۔
درخواست میں کہا گیا ہے کہ نومبر میں ہائیڈل سے 29 فی صد، کوئلے سے 12 فی صد بجلی پیدا کی گئی، نومبر میں آر ایل این جی سے بجلی کی پیداوار 12.09 فی صد رہی، جوہری ایندھن سے 27.94 فی صد، گیس سے 14.21 فی صد پیداوار رہی۔
