کراچی: صوبہ سندھ کے دارالحکومت کراچی میں طوفانی بارشوں کے بعد حسب معمول بجلی کے تقسیم کار ادارے کے الیکٹرک کا سسٹم بھی ٹھپ ہوگیا، ملیر میں پانی کے تیز بہاؤ کے باعث کے الیکٹرک کے نیٹ ورک کو نقصان پہنچا، متعدد علاقوں میں گزشتہ 20 گھنٹے سے بجلی کی فراہمی معطل ہے۔
تفصیلات کے مطابق شہر قائد کے مختلف علاقوں میں گزشتہ 20 گھنٹے سے بجلی کی فراہمی معطل ہے، عید کے دنوں میں شہری دہری اذیت کا شکار ہیں، سڑکیں اور گلیاں زیر آب ہیں جبکہ گھروں میں بجلی غائب ہے۔
لیاری اورڈی ایچ اے میں بارش سے متاثرہ فیڈرز تاحال بحال نہ ہوسکے، ملیر اور گڈاپ ٹاؤن کے درجن بھر سے زائد گوٹھوں، گلشن معمار، کوئٹہ ٹاؤن اور احسن آباد میں بجلی غائب ہے۔
گزری، اعظم بستی، رزاق آباد، گلشن حدید، پی ای سی ایچ ایس، بلوچ کالونی، اولڈ سٹی ایریا، ڈینسو ہال، پی آئی اے رہائشی کالونی، پہلوان گوٹھ، گلستان جوہر، رام سوامی، نشتر روڈ اور گارڈن سمیت متعدد علاقے بجلی سے محروم ہیں۔
دوسری جانب شہر کو بجلی کے تقسیم کار ادارے کے الیکٹرک کا کہنا ہے کہ ملیر میں پانی کے تیز بہاؤ کے باعث کے الیکٹرک کے نیٹ ورک کو نقصان پہنچا، نقصان کے باعث متعلقہ گوٹھوں کی بجلی منقطع ہے۔
ترجمان کے الیکٹرک کے مطابق پانی کے تیز بہاؤ کے باعث عملے کو کام میں دشواری کا سامنا ہے، کے الیکٹرک کا عملہ فیلڈ میں موجود ہے۔
