کراچی: شہر قائد کے باسیوں کے لئے بُری خبر ہے کہ فراہمی آب کے میگا منصوبے ‘کے فور’ کے ڈیزائن میں ایک بار پھر تبدیلی کردی گئی ہے، جس کے باعث 12 ارب روپے ضائع ہوگئے ہیں۔
ذرائع کے مطابق کے فور منصوبے کا نیا ڈیزائن تیار کیا گیا ہے، 650 ملین گیلن کا منصوبہ اب 260ملین گیلن تک محدود کردیا گیا ہے، نئےڈیزائن میں منصوبےکی لمبائی127کلومیٹر سے کم ہوکر108کلومیٹر رہ گئی ہے، منصوبےکی پی سی ون تیار کی جاچکی ہے، جسے جلد ہی اقتصادی رابطہ کمیٹی (ای سی سی) سےمنظورہونےکا امکان ہے۔
ذرائع کے مطابق منصوبہ اوپن کینال کےبجائےزیر زمین پائپ لائنوں پر بنایا جائےگا، منصوبےکی نئی لاگت 126 ارب روپے رکھی گئی ہے،جس پر کام کا آغاز مارچ2022 سے شروع ہوگا اور اسے 2 سال میں مکمل کیا جائے گا۔
یہ بھی پڑھیں: کے فور منصوبہ 2023 تک مکمل کرلیں گے ، چیئرمین واپڈا
ذرائع کا کہنا ہے کہ پندرہ سال کی تاخیر کا شکار اس منصوبے کو وفاق نے اپنے ذمے لیکر واپڈا کے حوالے کیا تھا، نئے منصوبے سے قبل سندھ اور وفاق کو آدھی آدھی لاگت برداشت کرنی تھی، منصوبہ میں چالیس کلو میٹرسے زائد اوپن کینال بچھائی جاچکی تھی جس پر 12 ارب لاگت آئی تھی جو نئے منصوبے کے بعد ضائع ہوگئے ہیں، خطیر رقم کا ضیاع کس کی نااہلی،کون ذمہ دار؟ اس کا تعین نہ کیا جاسکا۔
ذرائع نے مزید بتایا کہ اب منصوبہ کا نیا ٹھیکہ ٹیکنو کنسلٹ کودیاگیاہے، اس سے قبل عثمانی اینڈ کو منصوبے پر کام کررہی تھی۔
یاد رہے کہ کے فور کے منصوبے کے روٹ میں متعدد بار تبدیلی کی جاچکی ہے، جس کے نتیجے میں منصوبے کی لاگت بڑھتی چلی گئی جب کہ اس منصوبے کی 2007 میں تخمینی لا گت 25 ارب روپے تھی۔
