انوکھے انداز میں ’کچا بادام‘گانا گا کر دنیا بھر میں شہرت حاصل کرنے والا بھارتی شخص بھوبن بدیاکر اپنی کم علمی اور نادانی کے باعث بہت بڑا دھوکہ کھا بیٹھا جس کی وجہ سے اس کے گھر کا چولہا بھی ٹھنڈا ہوگیا۔
بھارتی میڈیا رپورٹس کے مطابق بھبن بڈیاکر کا گانا "کچا بادام” کے کاپی رائٹس کسی میوزک کمپنی نے دھوکے بازی سے ہتھیا لیے، میوزک کمپنی کی اس چال بازی کے بعد بے چارا بھبن بڈیاکر نہ تو اب اپنا گانا گا سکتا ہے اور نہ ہی سوشل میڈیا پر گانے کی ہونے والی آمدنی وصول کرسکتا ہے۔
ان کا کہنا ہے کہ ضلع بربھوم میں موجود ایک کمپنی اور اس کے مالک نے دھوکہ کرتے ہوئے انہیں کسی انڈین پرفارمنگ رائٹ سوسائٹی لیمیٹڈ نامی کمپنی کے ساتھ تین لاکھ روپے دے کر گانا ’کچا بادام‘ یوٹیوب پر شیئر کرنے کا کہا۔
بھوبن کو اس بات کا علم نہیں تھا کہ ان سے دھوکے کے ذریعے گانے کے جملہ حقوق بیچنے کے کاغذات پر دستخط کروا لیے گئے ہیں۔
آج کل وہ چھوٹی موٹی ملازمت کر کے اپنا پیٹ پال رہے ہیں اور ماہانہ چند ہزار روپے ہی کما رہے ہیں جس کے باعث ان کا گزارہ مشکل سے ہو رہا ہے۔
خیال رہے بھوبن بدیاکر مغربی بنگال میں مونگ پھلی بیچا کرتے تھے۔ سنہ 2019 میں ان کی ایک ویڈیو وائرل ہوئی جس میں وہ ’کچا بادام پکا بادام‘ گاتے ہوئے مونگ پھلی بیچ رہے تھے۔
ان کی اس ویڈیو کے بعد انہیں انٹرنیٹ پر بھرپور شہرت ملی جس کے بعد 2022 میں انہوں نے باجے والا ریکارڈ کی پروڈکشن میں کچا بادام گانا گایا جس کی ویڈیو کو اب تک 40 کروڑ سے زائد مرتبہ یوٹیوب پر دیکھا جا چکا ہے۔
انڈین میڈیا کے مطابق بھوبن بدیاکر کئی ماہ سے اپنا گاؤں والا گھر چھوڑ کر مغربی بنگال کے شہر دبراج پور میں اپنے بیٹے کے ساتھ رہائش پذیر ہیں تاہم ان کی مالی حالت کافی خراب بتائی جا رہی ہے۔
بھوبن بدیاکر نے وائرل ہونے والے گانے ’کچا بادام‘ سے جو پیسے کمائے تھے وہ اپنا گھر بنانے پر لگا دیے۔ لیکن مزید پیسے نہ ہونے کی وجہ سے ان کا گھر خالی پڑا ہے اور اسے تالا لگا ہوا ہے۔
یاد رہے کہ بھبن بڈیاکار مشہور ہونے سے قبل اپنی گزر بسر کیلئے مونگ پھلی فروخت کرتے تھے اور گاہکوں کو متوجہ کرنے کیلئے وہ اپنا گانا کچا بادام گنگناتے تھے، ایک دن ایک گاہک نے انکے گانے کی ویڈیو بناکر سوشل میڈیا پر شیئر کی تھی جس نے انہیں شہرت کی بلندیوں پر پہنچادیا تھا۔
لوگوں کو بھبن کے گانے کی ویڈیو اتنی پسند آئی تھی کہ وہ نہ صرف بھارت بلکہ پوری دنیا میں وائرل ہوئی اور بھبن دیکھتے ہی دیکھتے انٹرنیٹ سینسیشن بن گئے۔ مشہور ریپ سنگر بادشاہ نے بھی بھبن بڈیاکر کے ساتھ گانا کچا بادام ریکارڈ کرایا جو کافی مقبول ہوا۔
بدقسمتی سے بھبن بڈیاکر کو ملنے والی شہرت دیرپا ثابت نہ ہوسکی اور اب وہ ایک بار پھر انتہائی کسمپرسی کی حالت میں ہیں اور روتے ہوئے مدد کی درخواست کرنے پر مجبور ہیں۔
