کراچی: پاکستان مسلم لیگ فنکشنل سندھ نے کچے کے ڈاکوؤں کے خلاف سندھ میں فوجی آپریشن کا مطالبہ کیا ہے۔
تفصیلات کے مطابق رہنما پی ایم ایل ایف سردار عبدالرحیم نے میڈیا سے گفتگو کرتے ہوئے کہا ہے کہ صوبہ سندھ میں امن و امان کی صورت حال خراب ہو چکی ہے، کچے کے ڈاکوؤں کے خلاف فوجی آپریشن کیا جائے۔
سردار عبدالرحیم کا کہنا تھا کہ کشمور، شکارپور، گھوٹکی اور دیگر کچے کے علاقوں میں ڈاکوؤں کا راج ہے، کشمور میں مغویوں کی بازیابی کے لیے جاری دھرنے کی حمایت کرتے ہیں، مطالبہ کرتے ہیں کہ قانون نافذ کرنے والے ادارے فوری امن قائم کر کے مغویوں کو بازیاب کرائیں۔
کشمور سے اغوا کئے گئے مغوی کی رہائی کے لئے لواحقین سے 30 لاکھ روپے تاوان طلب
انھوں نے کہا زرداری مافیا نے پر امن سندھ میں ڈاکو راج کو پروان چڑھایا ہے، ڈاکوؤں کی سرپرستی کرنے والوں کو مضبوطی سے ہاتھ ڈال کر گرفتار کیا جائے، سردار عبدالرحیم نے ایس ایس پی کشمور پر تنقید کرتے ہوئے کہا کہ وہ مظاہرین کو دھمکیاں دینے کی بجائے کچے کے ڈاکوؤں اور ان کے سرپرستوں کے خلاف کارروائیاں کریں۔
