اردو کے مختلف ادیبوں اور مشہور شعرا کے حالاتِ زندگی کے ساتھ ہمیں ادبی تذکروں میں ان کی ادبی مجالس اور نشستوں کا احوال بھی پڑھنے کو ملتا ہے، اور روداد نویسوں نے ان ادبی شخصیات سے متعلق مختلف سنجیدہ اور بعض دل چسپ واقعات بھی رقم کیے ہیں۔
ہم اکثر ادبی تذکروں میں مشہور شعرا سے متعلق لطائف پڑھتے رہتے ہیں جو ان کی شگفتہ مزاجی، بذلہ سنجی اور ظرافت کے ساتھ ان کی علمیت اور حاضر دماغی کا ثبوت ہیں۔
کنور مہندر سنگھ بیدی جن کا تخلص سحر تھا، ہندوستان کے مشہور شعرا میں سے ایک ہیں۔ ایک مشاعرے میں ان کی نظامت سے متعلق تذکرہ کچھ یوں کیا گیا ہے۔ چیمسفورڈ کلب میں منعقدہ مشاعرہ میں سینئر اور مشہور شعرائے کرام مدعو تھے اور نظامت کے فرائض بیدی صاحب انجام دے رہے تھے۔
ایک شاعر اپنا کلام سنا چکے تو کنور صاحب نے عرش ملسیانی کو دعوت دی۔ وہ اپنی جگہ سے اٹھے اور مائیک اٹھانے کے لیے بڑھے تو بیدی صاحب کی آواز شرکا اور سامعین کی سماعتوں سے ٹکرائی۔ انھوں نے مدعو شاعر کے نام کی رعایت سے شعر پڑھ دیا اور داد سمیٹی۔ شعر یہ تھا۔
عرش کو فرش پر بٹھاتا ہوں
معجزہ آپ کو دکھاتا ہوں
اسی مشاعرے کے دوران ایک اور شاعر کو دعوتِ کلام دینے پہلے سامعین سے مخاطب ہوئے اور شاعر کا تعارف کچھ اس طرح کروایا۔
کیا ستم ظریفی ہے کہ اب میں ایک ایسے شاعر کو مدعو کررہا ہوں جو ہر طرف سے گھرا ہوا ہے اور قافیہ ردیف کا بھی پابند ہے۔ اس پر ستم یہ کہ سرکاری ملازم بھی ہے اور تخلص ہے ’آزاد۔‘ اس پر معروف شاعر جگن ناتھ آزاد مسکرائے، اپنی نشست سے اٹھے اور کلام پیش کرنے کے لیے مائیک تھام لیا۔
