تازہ ترین

شہر قائد سے ایک اور بچی لاپتہ، والدین شدید کرب کا شکار

کراچی: چوبیس گھنٹوں کے دوران کراچی کے علاقے کورنگی سے دوسری بچی کو اغوا کرلیا گیا ہے۔

تفصیلات کے مطابق واقعہ کورنگی ساڑھے پانچ نمبر میں پیش آیا، گمشدہ بچی کی والدہ نے اے آر وائی نیوز سے گفتگو کرتے ہوئے بتایا کہ بچی کی عمر نو سال ہے، بچی کھیلتے کھیلتے گھر سے باہر چلی گئی تھی، رات سے تلاش جاری ہے ابھی تک کوئی سراغ نہیں مل سکا ہے۔

دوسری جانب پولیس نے بھی بچی کی گمشدگی کی تصدیق کرتے ہوئے بتایا کہ کورنگی سے ایک اور بچی کےلاپتہ ہونےکی شکایت ملی ہے، والدین سے رابطہ کرکے تحقیقات کررہے ہیں، پولیس ٹیم والدین کیساتھ گھر روانہ کردی ہے۔

پولیس کا کہنا ہے کہ لاپتہ دوسری بچی کی ایف آئی آر درج کرلی گئی ہے، تحقیقات کاعمل جاری ہے،بچی کو تلاش کررہےہیں۔

اس سے قبل آج ہی کورنگی میں ہی نامعلوم ملزمان نے چھ سالہ ماہم کو اغوا وزیادتی کے بعد قتل کردیا تھا، میڈیکل رپورٹ میں ننھی ماہم سے زیادتی کی تصدیق ہوئی۔

مقتولہ بچی کے والد نے دلخراش روداد بیان کرتے ہوئے بتایا تھا کہ بیٹی گذشتہ رات نو بجے زمان ٹاؤن سے لاپتہ ہوئی، بچی کی گمشدگی کی رپورٹ زمان ٹاؤن تھانے میں دی گئی، رات بھر ماہم کی تلاش جاری رکھی مگر تمام کوششیں ناکام رہیں، آج میری بیٹی کی تشدد زدہ لاش کچراکنڈی سے ملی۔

ماہم کے والد نے انتہائی کرب میں اعلیٰ حکام سے اپیل کی کہ اس طرح کے واقعات کی روک تھام کی سنجیدہ کوشش کی جائے تاکہ آئندہ کسی بچی کے ساتھ یہ سانحہ نہ ہوں۔

Comments

- Advertisement -