کراچی: شہر قائد کے علاقے میمن گوٹھ میں ڈکیتی کی واردات کے دوران بہنوں کے سامنے بھائی کو قتل کردیا گیا۔
اے آر وائی نیوز کی رپورٹ کے مطابق کراچی کے علاقے میمن گوٹھ میں ڈکیتی کی واردات کے دوران ملزمان نے بہنوں کے سامنے بھائیوں کو قتل کردیا۔
ذرائع کا کہنا ہے کہ عبدالواحد نامی نوجوان ایک گھنٹے تک زخمی حالت میں تڑپتا رہا، شہری ویڈیو بناتے رہے، موٹر سائیکل سوار ملزمان نے مقتول سمیت خاندان کے چار افراد کو لوٹا۔
پولیس کے مطابق لوٹا گیا سامان واپس مانگنے پر ملزمان نے عبدالواحد کو گولی ماری، مقتول 2 بہنوں اور بہنوئی کے ساتھ میمن گوٹھ سے ملیر آرہا تھا، گزشتہ رات سنسان سڑک پر لوٹ مار کی واردات ہوئی تھی۔
ایس ایس پی ملیر کا کہنا ہے کہ مسلح ڈکیتوں کی تعداد تین تھی جو 2 موٹر سائیکل پر سوار تھے، ڈکیت موبائل فون اور پرس چھین کر فرار ہوئے، ایمبولینس پہنچنے میں تاخیر ہوئی، پولیس نے عبدالواحد کو اسپتال منتقل کیا، زیادہ خون بہہ جانے سے شہری اسپتال میں دم توڑ گیا۔
پی ای سی ایچ ایس بلاک 2 میں بینک کے باہر15 لاکھ کی مبینہ ڈکیتی
دوسری جانب کراچی کے علاقے پی ای سی ایچ ایس بلاک 2 میں بینک کے باہر سیکیورٹی کمپنی کے ملازم سے ڈاکو 15 لاکھ روپے لوٹ کر فرار ہوگئے۔
پولیس کے مطابق سیکیورٹی کمپنی کے اہلکاروں نے ملازم کو انتظار کرنے کا کہا تھا وہ رکنے کے بجائے باہر نکل آیا، ملزمان کمپنی کے ملازم سے 15 لاکھ روپے لوٹ کر فرار ہوگئے۔
پولیس کا کہنا ہے کہ سیکیورٹی کمپنی ملازم جمیل کو پوچھ گچھ کے لیے حراست میں لے لیا ہے۔
