کراچی: شاہ لطیف میں شہری کو واش روم میں دیر لگانا مہنگا پڑ گیا، انتظار میں کھڑے افراد نے شہری کو تشدد کا نشانہ بنا ڈالا۔
کراچی کے علاقے شاہ لطیف حسن پنہور گوٹھ میں شہری کو واش روم میں دیر لگانا مہنگا پڑ گیا، انتظارمیں کھڑے افراد نے شہری کو لوہے کا سریا مار کر شہری کی آنکھ ہی پھوڑ دی۔
زخمی شخص انور نے شاہ لطیف تھانے میں مقدمہ درج کرا دیا، مقدمے کے متن کے مطابق کمپنی میں کام کرتا ہوں چھٹی لے کر گھر جارہا تھا۔
متاثر شخص انور نے کہا کہ راستے میں پیٹ میں درد ہوا تو قریبی مسجد کے واش روم چلا گیا، باہر نکلتے ہی حیات اللہ نامی شخص نے مارنا پیٹنا شروع کر دیا، میں نے کہا بھی میرے پیٹ میں درد تھا اس لیے واش روم گیا تھا۔
انور نے کہا کہ حیات اللہ نے ہاتھ میں پکڑا ہوا سریا میری آنکھ میں مار دیا، آنکھ سے خون نکلا تو میں بھاگا لیکن راستے میں بے ہوش ہو گیا جس کے بعد محلے کے لوگوں نے مجھے اٹھا کر اسپتال پہنچایا۔
مدعی مقدمے کے مطابق یہ جھگڑا حسن پنہور گوٹھ کی مسجد میں پیش آیا تھا، ملزمان حیات اللہ اور سلیم کے خلاف قانونی کارروائی کی جائے۔
