کراچی: ہاکس بے اور سی ویو پر سمندر میں پانی کی سطح کم ہونے لگی لیکن ساحل پر دفعہ 144 کا نفاذ برقرار ہے۔
تفصیلات کے مطابق گزشتہ روز اونچی لہروں کے باعث ہاکس بے کا حفاظتی بند ٹوٹ گیا تھا، شدید لہروں کے باعث پانی ہٹس سے ہوتا ہوا سڑکوں پر آگیا تھا۔
ذرائع کے مطابق ماڑی پور سے ہاکس بے جانے والی سڑک کنٹینرز لگا کر بند ہے، اس کے علاوہ ہاکس بے سے سینڈزپٹ جانے والی سڑک بھی بند کردی گئی ہے۔
سمندری طوفان بیپر جوائے بھارتی گجرات سے ٹکرا گیا
واضح رہے کہ محکمہ موسمیات نے بتایا ہے کہ گزشتہ 3گھنٹوں میں طوفان بیپر جوئے نے شمال مشرق کی طرف رخ کرلیا، طوفان بدین کے جنوب سے 110کلو میٹر، کیٹی بندر کے جنوب مشرق سے 200 کلومیٹر دور ہے۔
محکمہ موسمیات نے بتایا ہے کہ طوفان بیپر جوئے ٹھٹھہ کے جنوب مشرق سے 180 کلو میٹر دور ہے، طوفان کے باعث ہوا کی رفتار 80 سے 100 کلو میٹر فی گھنٹہ سے چل رہی ہے، آج شام تک سسٹم مزید کمزور ہوکر ڈپریشن میں تبدیل جائے گا۔
یاد رہے کہ بحیرہ عرب میں بننے والے طوفان بیپر جوائے نے انتہائی شدت اختیار کر لی تھی ممکنہ خطرات کے پیش نظر 11 جون کو کراچی کے ساحل پر دفعہ 144 نافذ کردی گئی تھی۔
