کراچی میں جاری میٹرک امتحانات کے دوران پرچے دینے والی طالبات کے بیگ چوری ہو گئے اسکول انتظامیہ نے طالبات سے مبینہ بدتمیزی کی۔
اے آر وائی نیوز کے مطابق کراچی بھر میں میٹرک کے امتحانات جاری ہیں اور آج (بدھ) کے روز نویں جماعت کا کمپیوٹر سائنس کا پرچہ تھا۔ تاہم ایک امتحانی مرکز پیپر دینے والی طالبات کے بیگ چوری کر لیے گئے۔
یہ واقعہ لیاقت میں واقع ایک سرکاری اسکول میں پیش آیا جہاں امتحانات دینے کے لیے آنے والی طالبات کے بیگ مبینہ طور پر چوری ہو گئے۔ طالبات پیپر دے کر باہر آئیں تو ان کے بیگ غائب تھے۔
رپورٹ کے مطابق مبینہ طور پر کم سے کم تین طالبات کے بیگ چوری ہوئے۔ جب انہوں نے اپنا بیگ واپس مانگا تو اسکول انتظامیہ نے ان سے مبینہ بدتمیزی کی جب کہ طالبات اور ان کے اہلخانہ سے جھگڑا بھی ہوا۔
مبینہ طور پر چوری ہونے والے بیگز میں ایک طالبہ کے بیگ میں پیسے، موبائل فون اور عبایا جب کہ دوسری دو طالبہ کے مطابق ان کے بیگ میں قیمتی اشیا موجود تھیں۔
ایک اور متاثرہ طالبہ نے بتایا کہ اسکول میں ایک چوکیدار نے نیلے رنگ کی شلوار قمیض پہنی ہوئی تھی۔ جب وہ پیپر کے بعد واپس آئی تو نہ چوکیدار موجود تھا اور نہ ہی وہاں بیگ تھے۔
بیگ نہ ملنے پر طالبات، ان کے والدین اور اہلخانہ نے احتجاج کیا تو اسکول انتظامیہ نے انہیں دھکے دے کر امتحانی مرکز سے باہر نکال دیا۔
