کراچی: شہر قائد کے علاقے گلستان جوہر میں کچرا چننے والے ایک لڑکے پر گولی کیوں چلائی گئی، اور جھگڑا کیسے پیش آیا، خصوصی مناظر پر مبنی سی سی ٹی وی فوٹیج اے آر وائی نیوز نے حاصل کر لی۔
تفصیلات کے مطابق گلستان جوہر کامران چورنگی کے قریب کچرا چننے والے افغان لڑکوں پر فائرنگ کے کیس میں گلستان جوہر پولیس نے ایک سیکیورٹی گارڈ کو گرفتار کر لیا ہے۔
سی سی ٹی وی فوٹیج میں دیکھا جا سکتا ہے کہ کچرا چُننے والے 3 لڑکے گلی میں داخل ہوئے تو سیکیورٹی گارڈ نے ان کے ساتھ جھگڑا شروع کر دیا اور پھر گولی بھی مار دی۔
پولیس حکام کا کہنا ہے کہ فائرنگ کا واقعہ جھگڑے کے بعد پیش آیا، تین افغان شہری کچرے کا تھیلا اٹھائے گلی میں داخل ہوئے، مسلح سیکیورٹی گارڈ نے تینوں کو واپس جانے کا کہا، اور سخت تلخ کلامی کے بعد ان میں ہاتھا پائی شروع ہو گئی۔
فوٹیج میں دیکھا جا سکتا ہے کہ سیکیورٹی گارڈ ہتھیار سے تینوں کو مارنے لگا، جس پر ایک افغان نوجوان نے اس کے رپیٹر کو پکڑا اور مزاحمت کرنے لگا، اسی اثنا میں دوسری جانب سے ایک اور سیکیورٹی گارڈ بھی بھاگتا ہوا آیا۔
تاہم، سیکیورٹی گارڈ نے لڑکے پر اچانک سے گولی چلا دی، چھرے لگتے ہی افغان لڑکا زمین پر گر گیا، گولی کی آواز سنتے ہی باقی دونوں بچے گلی سے بھاگ گئے۔
فوٹیج کے مطابق سیکیورٹی گارڈ نے گولی مارنے کے بعد بھی زخمی لڑکے کو گھسیٹا اور تشدد کیا، دونوں میں کافی دیر اس حالت میں زبانی تکرار چلتی رہی۔
پولیس حکام کا کہنا ہے کہ زخمی لڑکے کو اسپتال منتقل کر دیا گیا ہے، اور اس سے بیان بھی لیا جا رہا ہے، جب کہ سیکیورٹی گارڈ کو گرفتار کر کے لاک اپ کر دیا گیا ہے۔
