کراچی کے سرکاری اسپتالوں میں سی ٹی اسکین کیلئے لگائے جانے والا انجیکشن کی عدم دستیابی کا انکشاف ہوا ہے۔
تفصیلات کے مطابق ذرائع کا بتانا ہے کہ سی ٹی اسکین کے لیے مریضوں کو کانٹراسٹ انجیکشن لگایا جاتا ہے جو ڈاؤ اوجھا کیمپس، سول اور جناح اسپتال میں دستیاب نہیں ہے۔
ذرائع نے بتایا کہ اسپتال انتظامیہ کی مریضوں کو سی ٹی اسکین کیلئے انجیکشن باہر سے خرید کر لانے کی ہدایت جاری کی ہے جبکہ مارکیٹ میں کانٹراسٹ انجیکشن دگنی قیمت پر فروخت کی جارہی ہے۔
ذرائع کے مطابق 3 سے 4 ہزار روپے میں ملنے والا انجیکشن 8 ہزار میں بیچا جارہا ہے، سندھ حکومت اور فارما کمپنیوں کے معاملات کے باعث انجیکشن کی قلت ہوئی ہے۔
اسپتال انتظامیہ کا اس حوالے سے کہنا ہے کہ درآمد میں کمی کے باعث کانٹراسٹ انجیکشن کی قلت ہے، جلد مسئلے کو حل کرنے کی کوشش کررہے ہیں۔
دوسری جانب نگراں وزیر صحت سندھ ڈاکٹر سعد خالد اس معاملے سے لاعلم نکلے، انہوں نے کہا کہ متعدد اسپتالوں میں کانٹراسٹ انجیکشن کی کمی کا علم نہیں۔
نگراں وزیر صحت ڈاکٹر سعد خالد نیاز نے کہا کہ اگر کانٹراسٹ انجیکشن دستیاب نہیں تو یہ سنجیدہ صورتحال ہے، جلد اس حوالے سے تفصیلات حاصل کروں گا۔
