The news is by your side.

کراچی جیل روڈ پر ریس لگاتی بس کے حادثے کی دل دہلا دینے والی ویڈیو

کراچی: گزشتہ روز جیل روڈ پر ریس لگانے کے دوران ایک بس کو حادثہ پیش آیا تھا، ریس لگانے کی فوٹیج اے آر وائی نیوز نے حاصل کر لی۔

اے آر وائی نیوز کے مطابق کراچی کے بس ڈرائیور معصوم شہریوں کی زندگیوں سے کھیلنے لگے ہیں، جیل روڈ پر گزشتہ روز کے حادثے کی سی سی ٹی وی فوٹیج سامنے آئی ہے، جس میں دیکھا جا سکتا ہے کہ حادثہ کیسے پیش آیا۔

فوٹیج کے مطابق یہ حادثہ 4 بسوں کے درمیان ریس لگانے کے دوران پیش آیا تھا، جس میں 10 افراد زخمی ہوئے تھے، جن میں سے پانچ خواتین بتائی جا رہی ہیں۔

سی سی ٹی وی فوٹیج میں بسوں کو فٹ پاتھ سے بالکل لگ کر ریس لگاتے دیکھا جا سکتا ہے، پہلے 3 بسیں ایک دوسرے کے پیچھے تیزی سے نکل گئیں، اور پھر کچھ فاصلے پر موجود چوتھی بس اسی تیزی سے جیل کی جانب دوڑتی نظر آئی۔

لیکن چوتھی بس کا ڈرائیور اسٹیئرنگ نہیں سنبھال سکا، اور اچانک بس بے قابو ہو کر فٹ پاتھ پر چڑھ گئی، اور درخت اور لوہے کی گرل سے جا ٹکرائی۔

فوٹیج میں بس پر سوار مسافروں کے گرنے کا ہولناک منظر بھی دیکھا جا سکتا ہے، بس کی ٹکر لگتے ہی 2 مسافر اچھل کر بس کے دروازے سے روڈ پر آ گرے، جن میں سے ایک بزرگ شہری بھی شامل ہے۔

بزرگ شہری نے اٹھنے کی کوشش کی لیکن زمین پر گر کر بے ہوش ہو گیا، سی سی ٹی وی فوٹیج میں حادثے کے بعد لوگوں کا ہجوم لگتے دیکھا جا سکتا ہے۔

Comments

یہ بھی پڑھیں