The news is by your side.

جماعت اسلامی کا کراچی بلدیاتی انتخابات کے نتائج میں تاخیر پر احتجاج کا اعلان

کراچی: جماعت اسلامی نے کراچی بلدیاتی انتخابات میں نتائج میں تاخیر، ردوبدول کے خلاف احتجاج کا اعلان کردیا۔

اے آر وائی نیوز کے مطابق امیر جماعت اسلامی سراج الحق نے کل 17 جنوری کو ملک بھر میں احتجاج کی کال دے دی ہے۔

سیکریٹری اطلاعات جماعت اسلامی قیصر شریف کا کہنا ہے کہ سراج الحق نے کل منصورہ میں اہم اجلاس طلب کیا ہے، جماعت اسلامی کی مرکزی قیادت کا اجلاس دو بجے منصورہ میں شروع ہوگا۔

انہوں نے بتایا کہ اجلاس میں کراچی کے بلدیاتی انتخابات کے حوالے سے لائحہ عمل کا اعلان بھی کیا جائے گا۔

حافظ نعیم الرحمان کی الیونتھ آور میں گفتگو

دوسری جانب امیر جماعت اسلامی کراچی حافظ نعیم الرحمان نے الیونتھ آور میں کہا کہ جماعت اسلامی نمبر ون، پی پی دوسرے اور تیسرے نمبر پر پی ٹی آئی ہے، آر اوز کے پاس اب تک لوگ بیٹھے ہیں نتائج نہیں دیے جارہے ،پی پی کے نتائج آرہے ہیں باقی لوگوں کے نہیں آرہے۔

حافظ نعیم الرحمان نے کہا کہ آر اوز بے شک تاخیر سے نتائج دیں لیکن نمبر تو درست کریں ہمارے پاس ثبوت موجود ہیں جہاں ہم جیتے وہاں ہرایا گیا ہے۔

امیر جماعت اسلامی کراچی نے کہا کہ آراوز کے تقرر پر ہم نے الیکشن کمیشن میں تحفظات کا اظہار کیا تھا، فارم 11 میں نتائج الگ اور الیکشن کمیشن الگ نتائج دے رہے ہیں، جماعت اسلامی 94 یوسیز سے جیت چکی ہے فارم 11 بطور ثبوت موجود ہے۔

حافظ نعیم الرحمان نے کہا کہ علی زیدی سے بھی رابطہ ہوا ان کا بھی یہی شکوہ ہے کہ علی زیدی کے مطابق بھی فارم 11 اور الیکشن کمیشن کے نتائج میں فرق ہے، یہ پہلے نتیجہ فکس کریں اس کے بعد بات ہوگی۔

ایک سوال کے جواب میں ان کا کہنا تھا کہ پیپلزپارٹی زبردستی اقلیت کو اکثریت میں بدل رہی ہے مسائل کے باوجود ہم نے الیکشن کرانے کا مطالبہ کیا تھا۔

Comments

یہ بھی پڑھیں