کراچی: کراچی کے علاقے بلال کالونی میں پولیس نے 100 سے زائد ڈکیتیوں میں ملوث گروہ کے 3 کارندے گرفتار کر لیے ہیں۔
ترجمان ڈسٹرکٹ سینٹرل پولیس کے مطابق کارروائی ٹیکنیکل بنیادوں اور سی سی ٹی وی فوٹیج کی مدد سے کی گئی ہے، ملزمان نے 100 سے زائد دوکانوں اور اسٹریٹ کرائم کی وارداتوں ملوث رہا ہے۔
پولیس ترجمان نے بتایا کہ گرفتار ملزمان میں خادم عرف لنگڑا ، اعظم کمانڈو اور نعیم بکک شامل ہیں، خادم عرف لنگڑا گروہ کا سرغنہ ہے اور خیرپور سندھ سے وارداتوں کے لئے کراچی آتا ہے۔
پولیس ترجمان کا کہنا تھا کہ ملزمان نے بلال کالونی کی حدود میں کرائے پر ایک کوارٹر لیا ہوا تھا جہاں سے یہ نیٹ ورک آپریٹ کررہے تھے، نعیم بکک اور اعظم کمانڈو دیگر ساتھی ملزمان کے ساتھ ملکر اسٹریٹ کرائم کی وارداتیں کرتے تھے۔
ترجمان ڈسٹرکٹ سینٹرل پولیس نے بتایا کہ گرفتار ملزمان دورانِ واردات مزاحمت پر فائرنگ بھی کرتے تھے، ملزمان کوارٹر سے شراب کا نشہ کرکے واردات کرنے نکلتے تھے اور واردات کے بعد واپس کوارٹر میں لوٹے ہوا مال آپس میں بانٹا کرتے تھے۔
ترجمان پولیس کا کہنا تھا کہ ملزم خادم لنگڑا اور اعظم کمانڈو چھینے ہوئے موبائل فون اپنے ساتھ لے جاتے اور بلاک موبائل فون سافٹویئر کے ذریعے کھلواکر فروخت کرتے تھے، ملزمان اس سے قبل بھی متعدد بار گرفتار ہوچکے ہیں۔
پولیس ترجمان نے مزید بتایا کہ دورانِ گرفتاری ملزمان کے قبضے سے 20 سے زائد چھینے ہوئے موبائل فون، 4 عدد ٹی ٹی پسٹل 30 بور لوڈ میگزین 15 راؤنڈز، 12 ہزار روپے نقد اور 1 125 موٹر سائیکل برآمد ہوئی ہے۔
ترجمان ڈسٹرکٹ سینٹرل پولیس کا کہنا تھا کہ گرفتار ملزمان کے خلاف مقدمات درج کر کے تفتیش کا آغاز کردیا گیا ہے۔
