کراچی : میٹرک کے طالب علموں سے ایڈمٹ کارڈ کے عوض رشوت لینے والے شخص کو گرفتار کرلیا گیا، آج میٹرک بورڈ آفس میں ایڈمٹ کارڈ وصول کرنے كا آخری دن ہے۔
تفصیلات کے مطابق کراچی کے میٹرک بورڈ آفس میں ایڈمٹ کارڈ وصول کرنے كا آخری دن ہے ، میٹرک بورڈ آفس میں طالب علموں سے ایڈمٹ کارڈ کے عوض رشوت لئے جانے کا انکشاف ہوا۔
مذکورہ شخص طالب علموں سے چھ چھ سو روپے طلب کر رہا تھا ، جس پر طالب علموں نے احتجاج کیا، طالب علموں کے احتجاج پر پولیس نے موقع پر پہنچ کر رشوت لینے والے شخص کو حراست میں لے لیا۔
خیال رہے کراچی میں میٹرک کے سالانہ امتحانات کا آغاز 8 مئی سے ہونے جارہا ہے، انتظامیہ کی جانب سے کہا گیا ہے کہ تاخیر سے امتحانی فارم جمع کرانے والے طلبہ کوآج ایڈمٹ کارڈ جاری ہوں گے۔
والدین نے شکایت کی تھی کہ ایڈمٹ کارڈ کے آن لائن اجرا میں بعض امیدوار کے امتحانی مراکز واضح نہیں ہو رہے ۔