کراچی کے علاقے گلستان جوہر میں گزشتہ روز ڈکیتی مزاحمت جاں بحق نوجوان نعمان کے معاملے میں اہم پیشرفت ہوئی ہے۔
اے آر وائی نیوز کے مطابق پولیس حکام کا کہنا ہے کہ مقتول نعمان کا دوست کرمنل ریکارڈ یافتہ ہے، نہتے شہریوں کی جانب سے ڈاکوؤں کا تعاقب کرنا مشکوک ہے۔
تھانہ گلستان جوہر میں قتل اور ڈکیتی کی دفعات کے تحت والد کی مدعیت میں مقدمہ درج کرلیا گیا ہے۔
مدعی مقدمہ کا کہنا ہے کہ بیٹے کے دوست نے بتایا کہ نعمان کو گولی لگی ہے، وہ اپنے دوست کے ساتھ اس کی بائیک پر سوار تھا۔
والد نے بتایا کہ بیٹے کے دوست کا کہنا تھا کہ دو ڈاکوؤں نے سائیڈ دیا جس کے بعد ہم نے ان کا تعاقب کرنا شروع کردیا، تعاقب کا علم ہوتے ہی ڈاکو نے انہیں روکنا چاہا نہ رکنے پر فائرنگ کردی۔
مدعی کا دعویٰ ہے کہ میرے بیٹے کو موٹرسائیکل چھیننے کے دوران مزاحمت پر قتل کیا گیا ہے۔
واضح رہے کہ رواں سال ڈکیتی مزاحمت پر جاں بحق افراد کی تعداد 80 ہوگئی ہے، گزشتہ دنوں بھی کورنگی میں ڈکیتی مزاحمت پر نوجوان کو قتل کردیا گیا تھا۔
