کراچی : کبوتر بازی کے دوران ہونے والے جھگڑے میں ایک شخص گولیاں لگنے سے ہلاک ہوگیا، ملزم واردات کے بعد فرار ہونے میں کامیاب ہوگیا۔
تفصیلات کے مطابق کراچی کے علاقے اورنگی ٹاؤن گلشن ضیاء میں فائرنگ سے ایک شخص کی ہلاکت کا واقعہ پیش آیا ہے۔
اس حوالے سے پولیس حکام کا کہنا ہے کہ کبوتر بازی پر ہونے والے جھگڑے میں پرویز نامی شخص کا قتل ہوا ہے۔
پولیس کے مطابق مقتول پرویز کا تعلق ایک سیاسی جماعت سے تھا، جس کا 20 روز قبل دوسری سیاسی جماعت کے ایک کارکن سے جھگڑا ہوا تھا۔
مقتول پرویز نے ملزم ندیم کے خلاف مقدمہ درج کرایا تھا جس پر وہ عدالت سے سزا ملنے کے بعد جیل چلا گیا تھا جس کا اسے بہت رنج اور غصہ تھا۔
گزشتہ روز ملزم ندیم جیل سے ضمانت پر رہا ہوکر واپس آیا اور آج موقع پاکر پرویز پر اندھا دھند فائرنگ کردی، پرویز نے زخموں کی تاب نہ لاتے ہوئے دم توڑ دیا۔ واردات کے بعد ملزم ندیم موقع سےفرارہوگیا، پولیس کا کہنا ہے کہ واقعے کا مقدمہ درج کرکے ملزم کی تلاش جاری ہے۔
