کراچی : شہر قائد میں تنخواہ لے کر گھر آنے والے نوجوان کو کورنگی سنگر چورنگی پر لوٹ لیا گیا، نوجوان نے اپنی کہانی سوشل میڈیا پر بیان کردی۔
تفصیلات کے مطابق ماہ رمضان میں کراچی کےشہریوں کی جان محفوظ ہے نہ مال، ڈاکو دندناتے پھر رہے ہیں، ابتدائی پندرہ روزمیں اسٹریٹ کرائم کی تین ہزار تین سو سے زائد وارداتیں رپوٹ ہوئیں۔
گزشتہ رات کورنگی سنگرچورنگی پر ڈاکو نوجوان سے پوری تنخواہ چھین کر لے گئے، نوجوان نے اپنی کہانی سوشل میڈیا پر شیئر کردی اور کہا ڈکیتی کے وقت پولیس سامنے کھڑی تھی، میں نے مدد مانگی، اہلکاروں کوپکارتا رہا لیکن پولیس نے کوئی مدد کی نہ ہی کوئی ایکشن لیا گیا، گھر والوں کو کیا منہ دکھاؤں گا۔
گذشتہ روز کورنگی انڈسٹریل ایریا میں ڈاکوؤں نے تاجر سے دن دیہاڑے پچاس لاکھ روپے لوٹ لیے، تاجر بینک سے رقم لے کرواپس جارہا تھا کہ گودام چورنگی پر دوموٹرسائیکلوں پرسوارتین ڈاکوؤں نے لوٹ لیا۔
خیال رہے رمضان کے ابتدائی پندرہ دنوں میں جرائم کی تین ہزار تین سو سے زائد وارداتیں ہوچکی ہیں اور یہی نہیں مزاحمت پر آٹھ شہری بھی قتل ہوچکے ہیں۔