کراچی: محکمہ موسمیات نے شہر قائد کے باسیوں کو خوشخبری سناتے ہوئے کہا ہے کہ شہر میں آج درمیانے درجے کی بارش کا امکان ہے۔
محکمہ موسمیات کے مطابق شہر میں اس وقت مطلع جزوی ابرآلود،موسم گرم اور مرطوب ہے، جبکہ موجودہ درجہ حرارت 32 ڈگری سینٹی گریڈ ہے۔
محکمہ موسمیات کے مطابق ہوا میں نمی کا تناسب 70 فیصد ہے، گرمی کی شدت 41 ڈگری سینٹی گریڈ تک محسوس کی جارہی ہے،شہر کا زیادہ سے زیادہ درجہ حرارت 37 ڈگری سینٹی گریڈ تک رہنے کاامکان ہے۔
تفصیلات کے مطابق ملک بھر میں مون سون کا دھواں دھار اسپیل جاری ہے، گزشتہ روز لاہور سمیت پنجاب کے بیشتر شہروں میں بادل کھل کر برسے جبکہ کراچی میں رات گئے بوندا باندی سے گرمی کا زور ٹوٹ گیا۔
محکمہ موسمیات کے مطابق مون سون کی ہوائیں بلوچستان میں داخل ہوگئیں جس کے بعد شمالی مشرقی علاقوں میں بارش کا سلسلہ جاری ہے، محکمہ موسمیات نے اس سال بلوچستان میں معمول سے زیادہ بارشوں کی پیشگوئی کی ہے۔
ملک کے مختلف شہروں میں آج گرج چمک کے ساتھ بارش کا امکان
محکمہ موسمیات کا کہنا ہے کہ بالائی سندھ، مشرقی بلوچستان، جی بی، کشمیر، کے پی میں بھی گرج چمک کے ساتھ بارش کا امکان ہے جبکہ شمال مشرقی بلوچستان، بالائی کے پی، خطہ پوٹھوہار میں چند مقامات پر موسلادھار بارش متوقع ہے۔
