متحدہ قومی موومنٹ پاکستان کے کنوینئر ڈاکٹر خالد مقبول صدیقی نے کہا ہے کہ اب ایسے حالات آگئے ہیں کہ حکومت خود دھرنے پر ہے، موجودہ نظام کو بڑی بے شرمی سے جمہوری نظام کہا جاتا ہے۔
کراچی میں پریس کانفرنس سے خطاب کرتے ہوئے ان کا کہنا تھا کہ ایم کیوایم پاکستان پہلے دن سے کہتی رہی ہے کہ ہم جاگیرداروں کی جماعت نہیں ہیں، پاکستان کی سیاست کے جمعہ بازار میں سینیٹر کی قیمت74کروڑ تک بھی پہنچی، ہم نےخریداری نہیں کی بلکہ اپنے پڑھے لکھے سینیٹر سینیٹ میں بھیجے۔
خالد مقبول صدیقی نے کہا کہ اس وقت ملک میں سیاسی، آئینی، معاشی اور اخلاقی سمیت کئی بحران جمع ہوگئے ہیں کہ طوفان آجائے، ایسے حالات آگئے ہیں کہ حکمران خود دھرنا دے رہے ہیں، پرانے نسخوں سے تبدیلی نہیں آسکتی، قوم کو نیا نہیں ایک بہتر پاکستان چاہیے۔
انہوں نے کہا کہ پاکستان کو ایک مضبوط جمہوری نظام کی ضرورت ہے، موجودہ نظام کو بڑی بےشرمی سے جمہوری نظام کہا جاتا ہے، ایسا ہونہیں سکتا کہ جاگیردارانہ نظام بھی اور جمہوریت بھی ہو، ملک کی تقدیر بدلنے کے لیے عوام کو آگے بڑھنا ہوگا۔
خالد مقبول صدیقی کا کہنا تھا کہ ہم سیاست کو عبادت سمجھتے ہیں،4مرتبہ ایم این اے رہا ہوں،
4مرتبہ الیکشن لڑے لیکن10 روپے بھی خرچ نہیں کیے، ایم کیوایم پاکستان مڈل کلاس امیدواروں کو بغیرخرچہ کے الیکشن لڑاتی ہے۔
ایم کیوایم کے خلاف طاقت کا بھرپور استعمال کیا گیا، ہم کسی سے پیسے نہیں لیتے،ایم کیوایم کے خلاف بہت سے آپریشن ہوئے، جو لوگ خاندانی سیاست کرتے ہیں انہیں یہ دہشت گردی نظرآتی ہے، ایم کیوایم کی مخالفت لسان پر نہیں بلکہ طبقات کی وجہ سے ہے کیونکہ ایم کیوایم غریب اور مڈل کلاس کی جماعت ہے۔
