خانیوال: پنجاب کے شہر خانیوال میں 2 ماہ قبل ہونے والی ڈکیتی کی فوٹیج ہونے کے باوجود ملزمان پکڑے نہ جا سکے۔
تفصیلات کے مطابق خانیوال میں دو ماہ قبل ایک موبائل شاپ پر بڑی ڈکیتی کی واردات ہوئی تھی، اس واردات کی فوٹیج بھی موجود ہے تاہم اس کے باوجود ملزمان تاحال پکڑے نہیں جا سکے ہیں۔
پولیس رپورٹ کے مطابق 4 ملزمان نے موبائل شاپ سے 60 لاکھ مالیت کے موبائل فون اور نقدی لوٹی تھی۔ سی سی ٹی وی فوٹیج میں ملزمان کو اطمینان سے واردات کرتے دیکھا گیا، تاہم واضح فوٹیج کے باوجود پولیس تاحال ملزمان کو گرفتار نہیں کر سکی۔
متاثرہ دکان دار نے اے آر وائی نیوز سے گفتگو کرتے ہوئے کہا کہ تھانے کے چکر لگا لگا کر تھک چکا، ڈی پی او کے پاس بھی گیا لیکن وہ کہتے ہیں کہ تھانے جاؤ۔
دکان دار نے اپیل کی ہے وزیر اعلیٰ اور آئی جی پنجاب سے اپیل ہے کہ ملزمان کو گرفتار کر کے ان کے نقصان کا ازالہ کیا جائے۔
