اسلام آباد : وفاقی وزیر تجارت خرم دستگیر خان نے کہا ہے کہ تمباکو اہم نقد آور فصل اور ہزاروں کسانوں اور ان کے خاندانوں کے لئے روزی کا ذریعہ بہترین ہے، ایسے کسانوں کی مدد کرنا موجودہ حکومت کی ترجیحی پالیسی ہے۔
ان خیالات کااظہار انہون نے پاکستان ٹوبیکو بورڈ (پی ٹی بی) اور پاکستان ٹوبیکو کمپنی (پی ٹی سی) اور فلپ مورس پاکستان لمیٹڈ ( پی ایم پی کے ایل) کے مابین ہونے والی مفاہمت کی یادداشت کی تقریب سے خطاب کر تے ہوئے کیا۔
تقریب کا مقصد تمباکو کی بہتری کے عمل کے لئے تمباکو کے گوداموں میں تبدیلیاں لانا ہے، مذکورہ تقریب وزارت تجارت میں ہوئی اس موقع پر پی ٹی بی کے چیئرمین اکرام غنی، پی ٹی سی سے ارشد خان اور اسد شاہ اور پی ایم پی کے ایل سے ارشاد خان نے دستخط کئے۔
خرم دستگیر خان نے اپنے خطاب میں کہا کہ پاکستان ٹوبیکو بورڈ کو کسانوں کی فلاح و بہبود کے لئے تمام ضروری اقدامات کرنے چاہئیں اور فعال سوچ اپنانی چاہئیے اور ٹوبیکو سیس ری فنڈ کے قواعد تمباکو برآمد کنندگان کی مدد کے لئے بنائے گئے ہیں۔
اس سکیم کی کل لاگت 20ملین روپے ہے جو کہ پی ٹی بی اپنے وسائل سے فراہم کرے گا جبکہ نجی شعبہ کی دو کمپنیاں ٹیکنیکل معاونت مفت فراہم کریں گی۔
یہ کمپنیاں رواں سیزن کے دوران تمباکو پر اثرات کے بارے میں تجزیہ کریں گی اور چھوٹے کسانوں کو ترجیح دیتے ہوئے تمباکو پیدا کرنے والے اضلاع کو پیداوار کے تناسب سے حصہ دیا جائے گا، اسکیم کے تحت تمباکو کے 400 گوداموں میں جدید ترین تبدیلیاں لائی جائیں گی۔
