صادق آباد: راولپنڈی کے 4 شہری سوشل میڈیا پر سستی کار کے اشتہار کے ٹریپ میں گرفتار ہونے سے بال بال بچ گئے۔
تفصیلات کے مطابق رحیم یار خان میں تھانہ کوٹ سبزل پولیس نے ایک کارروائی میں ٹریپ کے ذریعے اغوا کی کوشش ناکام بنا دی، پولیس اہل کاروں نے راولپنڈی کے چار شہریوں کو اغوا ہونے سے بچا لیا۔
ترجمان پولیس نے بتایا کہ شہریوں نے سوشل میڈیا پر سستی گاڑی کا اشتہار دیکھا تھا، جس پر انھوں نے اشتہار دینے والے افراد سے جو دراصل اغوا کار تھے، رابطہ کیا۔
پولیس ترجمان کے مطابق اغوا کاروں نے پنڈی کے شہریوں کو گاڑی خریدنے کے لیے سندھ کے کچے میں بلایا، شہری بھی بغیر دیکھے بھالے کچے کے علاقے میں چل پڑے۔
ترجمان پولیس نے بتایا کہ سندھ اور پنجاب کے بارڈر پر پولیس نے چاروں کو روک کر پوچھ گچھ کی تو وہ فوری طور پر سمجھ گئے کہ یہ ایک ٹریپ ہے، اور اس طرح انھیں خبردار کر کے اغوا ہونے سے بچا لیا۔
اے ایس پی صادق آباد شاہ زیب چاچڑ نے اس سلسلے میں اپنے ایک بیان میں شہریوں کو ہدایت کی ہے کہ کسی سستی اسکیم کے لالچ میں ہرگز نہ آئیں، اور اغوا کاروں کی چال سے بچیں۔ خیال رہے کہ پنجاب اور سندھ باڈر پر صادق آباد میں اغوا برائے تاوان صنعت بن گئی ہے، ڈاکوؤں نے شہریوں کو اغوا کرنے کا نیا طریقہ ’ہنی ٹریپ‘ اپنا لیا ہے۔ رواں برس جنوری میں کوٹ سبزل پولیس نے سستے ٹریکٹر کے ٹریپ میں آنے والے تین افراد کو اغوا ہونے سے بچایا تھا۔
سستی کار کے اشتہار پر قتل ہونے والے نیویارک پولیس کے پاکستانی افسر کی نماز جنازہ ادا
واضح رہے کہ گزشتہ دنوں نیویارک میں بھی اسی قسم کا ایک واقعہ پیش آیا تھا، جس میں نیویارک پولیس کا ایک پاکستانی نژاد افسر 26 سالہ عدید فیاض نے فیس بک مارکیٹ پلیس پر ایک کار کا اشتہار دیکھ کر رینڈی جونز نامی شخص سے ملاقات کی، جونز نے جعلی اشتہار کے ذریعے آنے والے عدید فیاض کو لوٹا اور پھر سر میں گولی مار کر قتل کر دیا۔
