کراچی : دو پولیس اہلکاروں کے قتل میں ملوث ملزم سہراب گوٹھ میں مقابلے کے دوران ہلاک ہوگیا۔
تفصیلات کے مطابق کراچی کے علاقے سہراب گوٹھ انڈس پلازہ میں پولیس اور ملزمان میں فائرنگ کا تبادلہ ہوا اس دوران پولیس اہلکاروں کی شہادت میں ملوث ملزم شرابو خان مارا گیا۔
اس حوالے سے ایس ایس پی ایسٹ زبیرشیخ نے میڈیا کو بتایا کہ 2روز قبل سہراب گوٹھ میں2اہلکاروں کی شہادت کا واقعہ پیش آیا تھا۔
ہلاک ملزم اور اس کے ساتھیوں نے پولیس اہلکاروں پر فائرنگ کی تھی، ہلاک ہونے والے ملزم کا کرمنل ریکارڈ جمع کیا جارہا ہے ملزم شرابو خان پہلے بھی گرفتارہوچکا ہے۔
ایس ایس پی ایسٹ کے مطابق ملزم ڈکیتی کے مقدمات میں مفرور اور اشتہاری تھا، ہلاک ملزم سے اسلحہ بھی برآمد ہوا ہے۔
واضخ رہے کہ 10 جون کو سہراب گوٹھ انڈر پاس کے قریب نامعلوم افراد کی فائرنگ سے 2پولیس اہلکار جاں بحق ہوگئے تھے ۔ پولیس کے مطابق مقامی گراؤنڈ میں کچھ مشتبہ افراد بیٹھے تھے کہ جنہیں یہ اہلکار چیک کرنے گئے۔
پولیس کو اپنی جانب آتا دیکھ کر ملزمان نے اہلکاروں پر فائرنگ کردی، جس کے نتیجے میں دونوں اہلکار موقع پر ہی دم توڑ گئے، شہید ہونے والے اہلکاروں کی شناخت رحمت اور حکیم کے ناموں سے ہوئی۔
