لاہور : آئی جی پنجاب عثمان انور نے پتنگ بازی کے خلاف کریک ڈاؤن تیز کرنے کا حکم دیتے ہوئے اعلیٰ پولیس افسران کو ہدایات جاری کردیں۔
تفصیلات کے مطابق پنجاب میں پتنگ بازی کے نتیجے میں ہونے والے خونی حادثات کے بعد پنجاب پولیس حرکت میں آئی جس کے نتیجے میں اب تک درجنوں افراد گرفتار کیے جاچکے ہیں۔
آئی جی پنجاب ڈاکٹر عثمان انور نے تمام پولیس افسران کو ہدایات جاری کی ہیں کہ اسپیشل ٹیمیں قانون شکنوں کیخلاف اقدامات یقینی بنائیں، دھاتی ڈور و پتنگوں کی تیاری، اس کی خرید و فروخت اور استعمال پرزیرو ٹالرنس ہے۔
عثمان انور کی جانب سے والدین کو اپنے بچوں کو پتنگ بازی سے باز رکھنے کی اپیل کی گئی ہے ان کا کہنا ہے کہ سپروائزری افسران دھاتی ڈور و پتنگوں کیخلاف کریک ڈاؤن کی خود نگرانی کریں۔
اس حوالے سے پنجاب پولیس کی رپورٹ کے مطابق گزشتہ 24گھنٹے میں پتنگ بازی ایکٹ کے تحت 41 ملزمان گرفتاراور 32 مقدمات درج کیے جا چکے ہیں۔
ترجمان پنجاب پولیس کا کہنا ہے کہ گرفتار ملزمان کے قبضے سے 957 پتنگیں، 23 چرخیاں برآمد کی گئی ہیں۔
اس کے علاوہ گزشتہ 34 روز میں مجموعی طور پر 3603ملزمان گرفتار کرکے 3469 مقدمات درج کیے گئے۔ ملزمان سے 217461 پتنگیں، 14693 چرخیاں برآمد کی گئیں۔
