برلن : چاقو بردار شخص نے حملے کرکے 3 افراد کو قتل اور 4 کو زخمی کردیا، ملزم واردات کے بعد فرار ہونے میں کامیاب ہوگیا۔
تفصیلات کے مطابق جرمنی میں مسلح شخص نے چاقو کے وار کرکے 3 افراد کو قتل اور 4 کو زخمی کردیا، واقعہ کی اطلاع ملتے ہی پولیس نے علاقے کو گھیرے میں لے لیا تاہم ملزم کی گرفتاری عمل میں نہ آسکی۔
جرمن میڈیا کی رپورٹس میں بتایا گیا ہے کہ چاقو کے حملے میں سولنگن شہر کے قیام کی سالگرہ کے موقع پر منعقد ہونے والے "فیسٹیول آف ڈائیورسٹی” کے موقع پر کیے گئے، جہاں صنعتی شہر سولنگن کی650 ویں سالگرہ منائی جارہی تھی۔
چاقو بردار حملہ آور تین افراد کو قتل اور 4 کو زخمی کرنے کے بعد باآسانی فرار ہونے میں کامیاب ہوگیا۔
اس حوالے سے پولیس ترجمان کا کہنا ہے کہ اب تک اس حملے کے پیچھے واضح مقاصد کا علم نہیں ہوسکا ہے، ہم ان تمام عینی شاہدین اور ان متاثرین سے معلومات حاصل کررہے ہیں تاکہ حملہ آور کو پکڑنے میں مدد مل سکے۔
صنعتی شہر سولنگن کی تقریب "فیسٹیول آف ڈائیورسٹی” کا آغاز جمعہ کو ہوا تھا اور یہ ہفتے کے آخر تک چلنے والا پروگرام تھا تاہم وقعے کے بعد اسے فوری طور پر منسوخ کردیا گیا۔
واضح رہے کہ اس سے قبل رواں سال مارچ میں جرمنی میں ایک مقامی شخص نے گھر میں داخل ہوکر کراچی سے تعلق رکھنے والے 58 سالہ محمد فہیم کو چاقو کے وار سے قتل جبکہ اہلیہ اور ان کی13 سالہ بیٹی کو شدید زخمی کردیا تھا۔
پولیس اطلاع ملنے پر موقع پر پہنچی اور فائرنگ کرکے حملہ آور کو ہلاک کردیا، پولیس کا کہنا ہے کہ قاتل ذہنی مریض تھا اور کچھ ماہ قبل ہی دماغی علاج کروا کے واپس آیا تھا۔
