کراچی: شہر قائد کے علاقے کورنگی کازوے میں ڈوبنے والے شہریوں کی لاشیں تاحال نہ مل سکیں جس کے باعث اہلخانہ پریشان ہیں۔
اے آر وائی نیوز کی رپورٹ کے مطابق کراچی کے علاقے کورنگی کازوے نے لاشیں نگل لیں، لاشیں نہ ملنے کے سبب اہلخانہ اپنے پیاروں کو تلاش کرنے کے لیے روز کازوے پہنچتے ہیں اور ناکامی پر واپس لوٹ جاتے ہیں۔
کراچی میں کورنگی کازوے میں ڈوبنے والوں کے اہلخانہ بھی پریشان ہیں، کسی کا بھائی لاپتا تو کسی کا بیٹا، کوئی والد کی تلاش میں روتا ہوا کازوے پہنچتا ہے تو کراچی سیلابی ریلے میں اپنے پیارے کو تلاش کرتا نظر آتا ہے۔
مزید پڑھیں: کراچی، کازوے پر ڈوبنے والوں کی موٹرسائیکلیں مل گئیں، لاشیں نہ مل سکیں
کازوے پر 7 روز سے بھائی کو تلاش کرنے والے شخص کا کہنا ہے کہ سات دن سے بھائی کا کچھ پتا نہیں چلا، سندھ حکومت مدد نہیں کررہی ہے۔
کراچی میں چار روز قبل ہونے والی باررش کے بعد بھی معمولات زندگی پوری طرح بحال نہ ہوسکے ہیں، بارش کے باعث سندھ میں 80 افراد جان کی بازی ہار گئے۔
واضح رہے کہ گزشتہ روز کازوے سے ایک شخص کی لاش برآمد ہوئی تھی جبکہ 12 موٹر سائیکلیں بھی نکالی گئی تھیں تاہم مزید لاشیں نہیں مل سکی ہیں۔
خیال رہے کہ گلستان جوہر صائمہ اسکوائر میں دیوار گرنے سے 4 بچے اور تین خواتین جاں بحق ہوگئی تھیں، علاقہ مکینوں کا کہنا تھا کہ دیوار بجلی گرنے کی وجہ سے گری۔
