کراچی: کورین کیمیکل کمپنی نے آج سے پلانٹ بند کرنے کا اعلان کر دیا۔
تفصیلات کے مطابق ملک کی خراب معاشی صورت حال، مرکزی بینک کی جانب سے زرمبادلہ کی عدم فراہمی کی وجہ سے کورین ملٹی نیشنل کمپنی نے اپنا پلانٹ غیر معینہ مدت کے لیے بند کرنے کا اعلان کر دیا۔
مختلف اقسام کے کیمیکلز تیار کرنے والی کورین کمپنی ’لوٹے کیمیکل کارپوریشن‘ نے کراچی میں پورٹ قاسم پر پلانٹ کو غیر معینہ مدت کے لیے بند کر دیا ہے۔
کمپنی کے سیکریٹری کی جانب سے پاکستان اسٹاک ایکسچینج کو ایک خط ارسال کر کے کہا گیا کہ ملک کی موجودہ معاشی صورت حال اور اسٹیٹ بینک کی جانب سے خام مال کی در آمد کے لیے زرمبادلہ کی عدم فراہمی کام میں رکاوٹ ہے۔
خط کا متن تھا کہ ’’بینکوں کی جانب سے لیٹر آف کریڈٹ نہ کھولے جانے کے باعث کمپنی کے لیے پلانٹ میں پیداواری سرگرمیاں جاری رکھنا نا ممکن ہو گیا ہے۔‘‘
خط میں کہا گیا کہ ’’کمپنی نے کراچی میں واقع اپنا پلانٹ 15 مارچ سے غیر معینہ مدت کے لیے بند کرنے کا فیصلہ کر لیا ہے۔‘‘
واضح رہے کہ خام مال کی در آمد کے لیے زرمبادلہ کی عدم فراہمی کے باعث مقامی کار ساز اسمبلرز اپنی پیداوار عارضی طور پر معطل کر چکے ہیں۔ موبائل فون بنانے والے مقامی کمپنی ٹیکنو پاکستان سمیت دیگر بعض کمپنیاں اپنی پیداواری سرگرمیاں معطل یا کم کر چکی ہیں۔
