پشاور(رپورٹ: عثمان دانش) وزیر محنت و ثقافت خیبرپختونخوا شوکت یوسفزئی نے پشاور کے چارلی چپلن کو ملازمت دینے کا اعلان کردیا۔
اے آر وائی نیوز کی رپورٹ کے مطابق صوبائی وزیر محنت و ثقافت شوکت یوسفزئی نے پشاور کے چارلی چپلن کو اپنے گھر بلا کر ملاقات کی اور میڈیا سے گفتگو کرتے ہوئے کہا کہ پشاور کے چارلی چپلن کو ملازمت دیں گے۔
صوبائی وزیر کا کہنا تھا کہ بہت خوشی ہورہی ہے کہ ایک نوجوان اداکار کے ساتھ بیٹھا ہوں، محمد عثمان نے مشہور زمانہ چارلی چپلن کا کا کردار اپنایا ہے یہ بہت خوشی کی بات ہے۔
شوکت یوسفزئی نے بتایا کہ وزیراعلیٰ محمود خان کو پشاوری چارلی چپلن کی ویڈیو بھیجی ہے، وزیر اعلیٰ کو میں نے بتایا کہ پشاوری چارلی چپلن محمد عثمان بے روزگار ہے، وزیر اعلیٰ نے ویڈیو دیکھ کر کہا کہ ہم اس کو ملازت دیں گے۔
مزید پڑھیں: چارلی چپلن اب پشاور میں : دیکھیے دلچسپ ویڈیو
انہوں نے کہا کہ ہم ان کی حوصلہ افزائی کریں گے یہ ان کا حق تھا ہم ہر سطح پر ان کو سپورٹ کریں گے۔
دوسری جانب پشاوری چارلی چپلن محمد عثمان نے کہا کہ حکومتی اقدام سے خوشی ہوئی، مزید محنت کروں گا، صوبائی حکومت اور شوکت یوسفزئی کا شکر گزار ہوں۔
محمد عثمان نے کہا کہ میرے پاس ملازمت نہیں تھی جس کی وجہ سے مشکلات کا شکار تھا، صوبائی حکومت نے مجھے ملازمت دینے کا اعلان کیا ہے اب اپنے کام پر پوری توجہ دوں گا۔
