لندن: سابق خاتون اول بیگم کلثوم نواز کی نماز جنازہ ادا کردی گئی۔ نماز جنازہ لندن کی ریجنٹ پارک مسجد میں ادا کی گئی۔
تفصیلات کے مطابق سابق خاتون اول کلثوم نواز کی نماز جنازہ ریجنٹ پارک مسجد میں ادا کی گئی۔
نماز جنازہ میں شریف خاندان اور مختلف طبقوں سے تعلق رکھنے والے افراد نے شرکت کی۔ پاکستانی ہائی کمیشن کے حکام بھی نماز جنازہ میں شرکت کے لیے موجود تھے۔
لندن میں اس وقت میت کے ساتھ مرحومہ کے بیٹے حسن اور حسین نواز ب موجود ہیں۔ دونوں بیٹے والدہ کا آخری دیدار لندن میں ہی کریں گے ، تدفین کے لیے پاکستان نہیں آئیں گے۔
مرحومہ کے شوہر نواز شریف کے بھائی شہباز شریف پاکستان سے ان کی میت وصول کرنے لندن آئے ہیں۔ اس موقع پر مسلم لیگ ن کے رہنما چوہدری نثار اور اسحٰق ڈار بھی موجود ہیں۔
خیال رہے کہ سابق خاتون اول بیگم کلثوم نواز طویل علالت کے بعد لندن میں انتقال کر گئی تھیں۔ اس موقع پر نواز شریف، ان کی صاحبزادی مریم نواز اور داماد کیپٹن صفدر کو پیرول پر رہا کیا گیا تھا۔
سابق خاتون اول کا جسد خاکی وطن لانے کے لیے نواز شریف کے بھائی شہباز شریف لندن پہنچے ہیں۔
بیگم کلثوم نواز کی نماز جنازہ ادا کیے جانے کے بعد شہباز شریف ان کا جسد خاکی لے کر وطن واپس پہنچیں گے۔
سابق خاتون اول کی تدفین لاہور میں واقع ان کی رہائش گاہ جاتی امرا میں ہی کی جائے گی۔
پاکستان روانگی
نماز جنازہ کے بعد شہباز شریف میت لے کر ایئرپورٹ روانہ ہوگئے ہیں۔ بیگم کلثوم نوازکی میت پی کے758کےذریعےلاہورلائی جائےگی۔
