لاہور : لاہور ہائی کورٹ نے موٹرسائیکل پر ہیلمٹ نہ پہننے والوں پر 5 ہزار روپے کا جرمانہ کرنے کا عندیہ دے دیا اور کہا جرمانہ کریں خلاف ورزی کرنے والے شہری خود ٹھیک ہو جائیں گے۔
تفصیلات کے مطابق لاہور ہائی کورٹ میں جسٹس شاہد کریم نے اسموگ کےخلاف دائر درخواستوں پر سماعت کی، دوران سماعت عدالت نے موٹرسائیکل پر ہیلمٹ نہ پہننے والوں کو 5 ہزار روپے جرمانہ کرنے کا عندیہ دے دیا۔
عدالت نے ٹریفک پولیس کو ہدایت کی کہ رولز بنائیں عدالت اس پر حکم جاری کردےگی ، 5ہزار جرمانہ کریں خلاف ورزی کرنے والے شہری خود ٹھیک ہو جائیں گے ، پہلے 10 دن ہیلمٹ کی تشہیر کریں اور شہریوں کوآگاہی دیں۔
عدالت نے سی بی ڈی کے انڈر پاس میں بارش کا پانی کھڑا ہونے پر سخت اظہار ناراضگی کرتے ہوئے سی ای او عمران امین اور سیکرٹری ہاؤسنگ سے جواب طلب کرلیا۔
عدالت کا کہنا تھا کہ انڈرپاس پہلی بارش بھی برداشت نہیں کرسکا، چیف انجینئر ایل ڈی اے کو خود مستعفی ہو جانا چاہیے تھا۔
عدالت نے سٹرکوں پر ٹریفک وارڈنز کا جگہ جگہ سٹرک بلاک کرکے چالان کرنےپراظہارناراضگی کرتے ہوئے کہا آدھی سٹرک بلاک کرکےوارڈنز چالان کررہےہوتے ہیں جس سے ٹریفک جام ہوتی ہے۔
