لاہور: لوکل گورنمنٹ ایکٹ کے خلاف ہائی کورٹ نے حکم امتناع کی درخواست پر فیصلہ محفوظ کر لیا، کیس کی سماعت جسٹس مامون الرشید نے کی۔
تفصیلات کے مطابق حکومت کی جانب سے پنجاب میں نئے بلدیاتی نظام کے نفاذ کے لیے ایکٹ کی منظوری کے خلاف لاہور ہائی كورٹ میں درخواست دائر کی گئی تھی۔
جسٹس مامون الرشید شیخ نے میئر لاہور کی درخواست پر سماعت کی، وکیل احسن بھون نے عدالت میں کہا کہ مدت مکمل کیے بغیر پرانا سسٹم ختم نہیں کیا جا سکتا۔
وکیل مئیر لاہور کا کہنا تھا کہ لوکل گورنمنٹ ایکٹ کی منظوری صرف چہرے بدلنے کے لیے کی گئی ہے۔
سرکاری وکیل نے عدالت میں کہا کہ قانون تبدیل کرنا حکومت کا اختیار ہے، ایکٹ کے خلاف درخواست نا قابل سماعت ہے، اسے مسترد کیا جائے۔
یہ بھی پڑھیں: پنجاب بھر میں نیا بلدیاتی نظام نافذ، ایڈمنسٹریٹر تعینات، نوٹی فکیشن جاری
عدالت نے استفسار کیا کہ کیا عوامی نمائندوں کی مدت پوری کرنا قانونی معاملہ ہے یا سیاسی؟ وکیل میئر لاہور نے کہا کہ سپریم کورٹ کے حکم پر الیکشن ہوئے جسے حکومت ختم کر رہی ہے۔
درخواست گزار نے کہا کہ عدالت لوکل گورنمنٹ ایکٹ کے خلاف حکم امتناعی جاری کرے، کیس کے فیصلے تک پرانے نظام کو بحال رکھنے کا حکم دیا جائے۔
دریں اثنا، عدالت نے لوکل گورنمنٹ ایکٹ کے خلاف حکم امتناع کی درخواست پر فیصلہ محفوظ کر لیا۔
