لکی مروت: پولیس اور سی ٹی ڈی کے مشترکہ آپریشن میں چھ دہشت گرد مارے گئے جبکہ بڑی تعداد میں اسلحہ برآمد کرلیا گیا۔
تفصیلات کے مطابق خیبر پختوںخواہ کے ضلع لکی مروت پولیس اور سی ٹی ڈی نے تھانہ ڈڈیوالہ کی حدود میں آپریشن کیا اور اس دوران 6 دہشتگرد ہلاک کردیے۔
حکام نے بتایا کہ ضلع لکی مروت پولیس کو اطلاع ملی تھی کہ مختلف بم حملوں اور دہشت گرد گردی کی ورادتوں میں ملوث دہشت گرد تھانہ ڈڈیوالہ کے علاقے میں موجود ہیں اور چوکی عباسہ پر حملے کا منصوبہ بنارہے ہیں۔
جس پر لکی مروت پولیس اور سی ٹی ڈی بنوں کی ٹیم دہشت گردوں کے ٹھکانوں پر انٹیلیجنس بیسڈ آپریشن کے لیے پہنچی تو دہشت گردوں نے پولیس پارٹی پر فائرنگ شروع کردی۔
پولیس نے بھی جوابی فائرنگ شروع کی اور فائرنگ کے نتیجے میں 6 دہشت گرد ہلاک ہوگئے۔
پولیس نے دہشت گردوں کے قبضے سے بھاری تعداد میں اسحلہ بھی برآمد کرلیا ہے۔
پولیس کا کہنا ہے کہ چاروں ہلاک دہشت گردوں کی شناخت ضیاءاللہ عرف کوچی صفت اللہ عرف ڈرون ، محیب اللہ اور کلیم اللہ عرف فقیر و کے نام سے ہوئی ہے۔ جبکہ دو دہشت گردوں کی شناخت ابھی نہیں ہوئی ان کی شناخت کی جا رہی ہے۔
پولیس ذرائع نے بتایا کہ ہلاک دہشت گرد پولیس اور سیکورٹی فورسز پر حملوں اور دہشت گردی کے واقعات میں ملوث رہے ہیں۔
واقعہ کے بعد پولیس کی مزید نفری جائے وقوعہ پر پہنچ کر علاقے میں سرچ آپریشن شروع کردیا ہے۔
