کراچی: کورنگی میں ڈکیتی مزاحمت پر قتل ہونے والے نجی یونیورسٹی کے ہونہار طالب علم لاریب کے قتل کا مقدمہ درج کرلیا گیا ہے۔
اے آر وائی نیوز کے مطابق کورنگی انڈسٹریل ایریا تھانے میں مقتول لاریب کے والد کی مدعیت میں مقدمہ درج کیا گیا، جبکہ ایف آئی آرمیں نامعلوم ملزمان کو نامزد کیا گیا ہے۔
واضح رہے کہ وزیراعلیٰ سندھ مراد علی شاہ کے احکامات پرایسٹ پولیس نے طالبعلم لاریب کے قتل پر ایس ایچ او کورنگی انڈسٹریل ایریا فراز کو معطل کردیا۔
تفصیلات کے مطابق وزیراعلیٰ سندھ مراد علی شاہ نے طالب علم لاریب کے قتل کا نوٹس لیتے ہوئے آئی جی سے واقعہ کی رپورٹ طلب کرلی۔
وزیراعلیٰ سندھ نے کہا کہ ایسے واقعات کی ہرگز گنجائش نہیں، طالبعلم ہمارا قیمتی سرمایہ ہیں، جہاں ڈکیتی کی واردتیں زیادہ ہوتی ہیں وہاں پولیس گشت میں اضافہ کیا جائے،چھینا جھپٹی کی بڑھتی وارداتیں تشویش کا باعث ہیں۔
مراد علی شاہ کا کہنا تھا کہ مجھے شہر میں ہر صورت امن و امان کی فضا برقرار چاہیے، ماحول سے خوف کی فضاکو ہر صورت ختم کرنا ہوگا، مجھے لاریب کے قاتل فوری گرفتار کر کے رپورٹ دیں۔
طالبعلم لاریب قتل کیس میں وزیراعلیٰ کے احکامات پر ڈی آئی جی ایسٹ نے ایکشن لیتے ہوئے ایس ایچ او کورنگی انڈسٹریل ایریا فراز کو معطل کردیا اور عہدے میں تنزلی کردی۔
یاد رہے کراچی میں کورنگی اللہ والا ٹاون میں نجی یونیورسٹی کے طالب علم کو ڈاکوؤں نے مزاحمت کرنے پر فائرنگ کرکے قتل کردیا تھا۔
شوہر سے جھگڑے پر بیوی نے خود کو گولی مار لی
پولیس کے مطابق ملزمان نے گلی میں پہلے ایک لڑکے کو لوٹا اور پھر لاریب کو لوٹنے کی کوشش کی، مزاحمت کرنے پر دو گولیاں چلائیں، ایک گولی لاریب کو آنکھ کے پاس لگی جو جان لیوا ثابت ہوئی، جاعہ وقوع سے ایک نائن ایم ایم کا خول ملا ہے تاہم اطراف کی سی سی ٹی وی فوٹیج حاصل کرکے ملزمان کی تلاش شروع کردی گئی ہے۔
