امریکی شہر لاس ویگاس کی یونیورسٹی میں فائرنگ کا واقعہ پیش آیا ہے، جس کے باعث 3 افراد لقمہ اجل بن گئے جبکہ ایک شخص کے شدید زخمی ہونے کی اطلاعات ہیں۔
بین الاقوامی خبر رساں ادارے کی رپورٹ کے مطابق امریکی یونیورسٹی آف نیواڈا کے لاس ویگاس کیمپس میں پیش آنے والے واقعے میں ملوث شخص بھی فائرنگ کے تبادلے میں مارا گیا۔
حکام نے اس حوالے سے آگاہ نہیں کیا کہ حملہ آور پولیس کی فائرنگ سے ہلاک ہوا یا اس نے خود کو گولی ماری تھی تاہم پولیس ذرائع کا کہنا ہے کہ انہیں ایمرجنسی نمبر پر یونیورسٹی کیمپس میں فائرنگ سے متعلق اطلاعات موصول ہوئیں جس کے بعد قریب موجود افسران نے فوری طور پر جائے وقوعہ پر پہنچ کر حملہ آور کو ہلاک کردیا۔
لاس ویگاس پولیس کے شیرف نے بتایا کہ فائرنگ کے واقعے کے بعد طلباء میں خوف و ہراس پھیل گیا ہے، جبکہ شہری بھی خوف میں مبتلا ہیں۔
حملہ آور کی ہلاکت کے بعد لاس ویگاس میٹروپولیٹن پولیس نے سکیورٹی کلیئرنس دی تاہم یونیورسٹی انتظامیہ کی جانب سے کیمپس کو ایک دن کیلئے بند کردیا گیا۔
’پیوٹن سعودی عرب پہنچ گئے، شہزادہ محمد بن سلمان سے ملاقات‘
واضح رہے کہ اس سے قبل بھی ایک افسوسناک واقعہ 2017 میں رونما ہوا تھا جب لاس ویگاس کے ایک ہوٹل کی اونچی عمارت کی کھڑکی سے ایک فیسٹیول پر فائرنگ کے واقعے میں 60 افراد ہلاک اور درجنوں زخمی ہوگئے تھے۔
