اسلام آباد : وزارتِ داخلہ نے کراچی اور حیدرآباد کے بلدیاتی انتخابات میں حساس پولنگ اسٹیشنوں پر فوج اور رینجرز کی تعیناتی سے معذرت کرلی۔
تفصیلات کے مطابق سندھ بلدیاتی انتخابات سے متعلق وزارت داخلہ نے سیکرٹری الیکشن کمیشن کو خط کا جواب دے دیا ہے، جس میں 15 جنوری کو حساس پولنگ اسٹیشنز کے باہر پاک فوج اور ریجنرز تعیناتی کی درخواست کی گئی ہے۔
جواب میں کہا گیا کہ پولنگ اسٹیشنز کے باہر پاک فوج اور رینجرز کی اسٹیٹک تعیناتی کے معاملہ حکومت کی جانب سے جی ایچ کیو کے ساتھ اٹھایا گیا کہ حساس ترین پولنگ اسٹیشنوں پر تعیناتی کیلئےبیس ہزاراہلکار درکار ہوں گے۔
وزارت داخلہ کا کہنا تھا کہ جی ایچ کیو نے کہا ہے کہ اتنی بڑی تعداد میں اہلکار فراہم نہیں کرسکتے، صوبائی محکمہ داخلہ ، پولنگ اسٹیشن پر پہلے درجے یا اسٹیٹک تعیناتی پر پولیس/ مطلوبہ دستے فراہم کرنے کی ذمہ دار ہے، سول ارمڈ فورسز اور پاک فوج صرف دوسرے یا تیسرے مرحلے پر بطور کوئیک رسپانس فورس تعینات کی جا سکتی ہے۔
وزارت داخلہ کے خط میں کہا گیا کہ الیکشن کمیشن نے پہلے ہی 8 ہزار 924 پولنگ اسٹیشنز کو حساس یا انتہائی حساس ڈکلیئر کیا ہے۔ کسی پولنگ اسٹیشن کو نارمل ڈکلیر نہیں کیا گیا۔
خط میں بتایا گیا کہ اس وقت فوج سرحدوں اور اندرونی سیکیورٹی پر تعینات ہے، 2ہزار 395 انتہائی حساس پولنگ اسٹیشنز کے باہر اسٹیٹک تعیناتی کے لیے 20 ہزار فوج اور رینجرز کو فراہم نہیں کیا جا سکتا، آرمی اور رینجرز بطور دوسرے اور تیسرے درجے تعیناتی کے لیے دستیاب ہوں گی، جس کا نوٹیفیکشن وزارت داخلہ پہلے ہی کر چکی ہے۔
