لاہور : چیف جسٹس لاہور ہائی کورٹ نے حمزہ شہباز کی ضمانت کی درخواستوں پر سماعت کے لیے نیا بنچ تشکیل دے دیا، حمزہ شہباز نے بنچ پر عدم اعتماد کا اظہار کیا تھا ، جس پر دو رکنی بنچ نے سماعت سے معذرت کرلی تھی۔
تفصیلات کے مطابق چیف جسٹس لاہور ہائی کورٹ نے حمزہ شہباز کی جانب سے صاف پانی کمپنی، رمضان شوگر ملز اور آمدن سے زائد اثاثے کیسوں میں ضمانت کی درخواستوں کی سماعت کے لیے نیا دو رکنی بنچ تشکیل دے دیا۔
بنچ کی سربراہی جسٹس مظاہر علی اکبر نقوی کریں گے جبکہ جسٹس محمد وحید خان دو رکنی بنچ میں شامل ہوں گے۔
حمزہ شہباز کی درخواست ضمانت پر جسٹس علی باقر نجفی کی سربراہی میں دو رکنی بنچ سماعت کر رہا تھا تاہم حمزہ شہباز نے بنچ پر عدم اعتماد کرتے ہوئے استدعا کی تھی کہ کیس دوسری عدالت کو بھجوایا جائے۔
مزید پڑھیں : حمزہ شہبازکا لاہور ہائی کورٹ بنچ پراچانک عدم اعتماد کا اظہار
ملزم حمزہ شہباز نے کہا تھا چیئرمین نیب کہتےہیں حمزہ شہبازکے لیے بینچ تبدیل کرایا، کیاچیئرمین نیب اتنا طاقتور ہے جو مرضی کا بنچ بنوا کر حمزہ شہباز کی ضمانت منسوخ کروا سکتا ہے۔ لہذا اس بینچ پر تحفظات ہیں۔
جس پر دو رکنی بنچ نے سماعت سے معذرت کرتے ہوئے کیس چیف جسٹس لاہور ہائی کورٹ کو بھجوا دیا تھا، فاضل ججز کا کہنا تھا کہ درخواست گزار نے چیئرمین نیب کےانٹرویوکی بنیاد پر تحفظات کااظہارکیا،اب مزیدسماعت نہیں کرسکتے۔
نئی صورتحال میں حمزہ شہبازکی عبوری ضمانت میں غیرمعینہ مدت تک توسیع ہوگئی تھی۔
