اسلام آباد : خطے کیلئے گیم چینجر منصوبے سی پیک کے دس سال مکمل ہونے کی مرکزی تقریب آج ہوگی ، وزیراعظم شہبازشریف اور چینی نائب وزیر اعظم تقریب کےمہمان خصوصی ہوں گے۔
تفصیلات کے مطابق سی پیک کی ایک دہائی مکمل ہونے کی مرکزی تقریب آج شام اسلام آباد میں ہوگی ، تقریب کو سی پیک کی ایک دہائی "وژن سےحقیقت تک”کا نام دیا گیا ہے۔
ذرائع نے بتایا کہ شہباز شریف اور چینی نائب وزیر اعظم تقریب کےمہمان خصوصی ہوں گے جبکہ تقریب میں وفاقی وزراء، وفاقی سیکرٹریز ، ارکان قومی اسمبلی و سینیٹ اور بزنس کمیونٹی شرکت کریں گے۔
پاکستان اورچین نے10 سال قبل 5جولائی2013کوسی پیک منصوبے کا آغاز کیا تھا، حکام کا کہنا ہے کہ سی پیک کے تحت 25 ارب ڈالرز سے زائد کی سرمایہ کاری کی گئی اور سی پیک منصوبوں سےلاکھوں افراد کو روزگار کے مواقع میسر آئے۔
حکام کے مطابق سی پیک منصوبوں کے تحت 8 ہزار میگاواٹ بجلی پیداہوئی اور چین کےاشتراک سے معاشی و اقتصادی ترقی کے منصوبے لگائے گئے۔
