بلوچستان عوامی پارٹی نے اپوزیشن سے معاملات طے ہونے کی تردید کرتے ہوئے کہا ہے کہ عدم اعتماد پر پارلیمانی پارٹی کی مشاورت جاری ہے۔
بلوچستان عوامی پارٹی کے رہنما خالد مگسی نے بی اے پی کی اپوزیشن سے معاملات طے ہونے کی تردید کردی ہے۔
اپنے بیان میں انہوں نے کہا ہے کہ بی اے پی معاملات کو مشاورت کے ساتھ لیکر آگے چل رہی ہے اور عدم اعتماد کے معاملے پر ابھی تک کوئی فیصلہ نہیں کیا گیا ہے اس سلسلے میں پارلیمانی پارٹی کی مشاورت جاری ہے۔
خالد مگسی کا مزید کہنا تھا کہ پارلیمانی پارٹی کو مختلف جماعتوں سے ملاقاتوں سے آگاہ کیا جائیگا اور اس کے بعد پارلیمانی پارٹی کے اجلاس میں حتمی فیصلہ کیا جائیگا۔
واضح رہے کہ اس سے قبل یہ اطلاعات آئی تھیں کہ بلوچستان عوامی پارٹی کی اکثریت اپوزيشن کا ساتھ دینے کو تیار ہے، بی اے پی کے ایم پی ایز کی اکثریت پی ڈی ایم کو ساتھ دینے کا یقین دلا چکی ہے۔
مزید پڑھیں: نیا سیاسی بھونچال: بلوچستان عوامی پارٹی کیا کرنے جارہی ہے؟
پی ڈی ایم ذرائع کا کہنا ہے کہ ق لیگ اور ایم کیوایم کی جانب سے اپوزیشن کا ساتھ دینے کےاعلان کا انتظار ہے، دونوں جماعتوں کے اعلان کے ساتھ ہی چیئرمین سینیٹ کے خلاف عدم اعتماد آجائےگی۔
