کراچی+لاہور+مری: ملک کے مختلف شہروں میں شام ہوتے ہی لاکھوں شہریوں نے اپنی سواریوں پر رشتہ داروں اور تفریح گاہوں کا رخ کیا جس کے سبب بدترین ٹریفک جام ہوگیا، شاہراہوں پر گاڑیوں کی طویل قطاریں لگ گئیں۔
اطلاعات کے مطابق کراچی میں گلشن اقبال، الٰدین پارک، راشد منہاس روڈ، جہانگیر روڈ، تین ہٹی، لسبیلہ، غریب آباد، کریم آباد، عائشہ منزل، حسن اسکوائر، ابوالحسن اصفہانی روڈ، نیپا،یوپی موڑ، ناگن چورنگی اور ڈرگ روڈ پر ہزاروں انتہائی سست رفتاری سے منزل مقصود کی جانب رواں دواں ہیں، شہریوں کا منٹوں کا سفر گھنٹوں میں طے ہورہا ہے۔
اس طرح تفریح کے لیے لاکھوں شہریوں کے سی ویو جانے کے سبب اس روڈ پر بھی بدترین ٹریفک جام ہوگیا،موٹرسائیکلیں اور گاڑیاں راستے بدلتے ہوئے کلفٹن اور ڈیفنس میں بھی داخل ہوگئیں تاہم انہیں سی ویوجانے والے ہر رستے پر گاڑیوں کی قطاریں ہی ملیں۔
اے آئی وائی نیوز کراچی کے نمائندے صلاح الدین کے مطابق ٹریفک جام اس قدر بدترین ہے کہ بہت سی گاڑیوں کا ایندھن تک ختم ہوگیا ہے جب کہ ٹریفک پولیس کے اہلکار کہیں بھی نظر نہیں آرہے۔
الہٰ دین پارک میں عوام کا داخلہ بند
ٹریفک جام کے سبب راشد منہاس روڈ پر واقع الہٰ دین پارک میں عوام کا داخلہ بند کردیا گیا۔ڈپٹی کمشنر ایسٹ قاضی جان نے کہا کہ عوام کے بے پناہ ہجوم کے سبب الٰہ دین پارک کےاطراف ٹریفک جام ہوگیا، عوام سے اپیل ہے کہ وہ الٰہ دین پارک نہ آئیں یہاں پہلے ہی ہزاروں افراد موجود ہیں۔
مری میں راول جھیل سے گلیات تک ٹریفک جام
ملک کے دیگر شہروں کی طرح مری میں بھی ٹریفک جام ہوگیا، روال جھیل سے مری گلیات تک گاڑیوں کی قطاریں لگ گئیںِ۔اطلاعات کے مطابق مری روڈ، گلیات، ایوبیہ، نتھیا گلی تفریح کے لیے آنے والے ہزاروں شہری پھنسے ہوئے ہیں، ٹریفک انتہائی سست رفتاری سے چل رہا ہے۔پولیس ذرائع کا کہنا ہے کہ مری میں آج پچاس ہزار سے زائد گاڑیوں داخل ہوئیں جس کے سبب ٹریفک جام ہوا۔
اطلاعات ہیں کہ لاکھوں سیاح کے بیک وقت مری پہنچنے کے سبب ٹریفک جام ہوگا، تمام ہوٹل بک ہوچکے ہیں سڑکوں پر لگے ہوئے تخت اور ہوٹلوں سمیت کہیں بھی جگہ خالی نہیں ہے۔
وزیراعلیٰ پنجاب نے مری میں ٹریفک جام کا نوٹس لیتے ہوئے متعلقہ حکام کو ہدایت دی ہے کہ ٹریفک جام کا معاملہ فوری طور پر حل کیا جائے،شہریوں کی لمحہ بہ لمحہ رہنمائی کی جائے اور مری روڈ پر ٹریفک کی روانی بہتر بنائی جائے۔
لاہور میں فوڈ اسٹریٹس کے اطراف گاڑیوں کی قطاریں
اسی طرح لاہور میں بھی فوڈ اسٹریٹس، باغات سمیت تفریح گاہوں اور شہر کی دیگر اہم شاہراہوں پر ٹریفک جام کی اطلاعات ہیں۔
