مانچسٹر سٹی نے فائنل مقابلے میں برازیلین کلب فلومیننس کو شکست فاش دیتے ہوئے فیفا کلب ورلڈ کپ جیتنے کا اعزز حاصل کرلیا۔
فیفا کلب عالمی کپ کا فائنل پوری طرح سے یکطرفہ ثابت ہوا، انگلینڈ کی سائیڈ مانچسٹر سٹی نے فائنل میں برازیلین کلب فلومیننس کو 0-4 سے شکست دیتے ہوئے پہلی بار ٹائٹل جیتنے کا اعزاز حاصل کیا۔
فاتح سائیڈ نے جدہ کے کنگ عبداللّٰہ اسپورٹس سٹی میں کھیلے گئے فائنل میچ کے پہلے ہی منٹ میں گول کردیا، جولیان الواریز نے ہیڈر کے ذریعے گیند کو جال کی راہ دکھائی۔
ناکام سائیڈ نے اس وقت اپنے پاؤں پر خود کلہاڑی ماری جب 27ویں منٹ میں برازیلین کلب فلومینیز کے نینو کے اون گول سے مانچسٹر سٹی کی برتری 0-2 ہوگئی۔
مانچسٹر سٹی کی جانب سے فل فوڈین نے دوسرے ہاف میں اپنی ٹیم کا تیسرا گول کیا۔ میچ کے آخری لمحات میں جولیان الواریز نے ٹیم کا چوتھا اور اپنا دوسرا گول اسکور کیا۔
فیفا کلب ورلڈکپ جیتنے والی مانچسٹر سٹی نے پہلی بار یہ اعزاز اپنے نام کیا ہے۔ ساؤتھ امریکن چیمپین برازیلین کلب فلومیننس کی کارکردگی فائنل میں واجبی رہی۔