کراچی : مشیر زراعت سندھ منظور وسان نے پیش گوئی کی ہے کہ عمران خان اسلام آباد جلسے میں استعفے کا اعلان کر سکتے ہیں۔
تفصیلات کے مطابق سیاسی پیشگوئیوں کے حوالے سے شہرت رکھنے والے پاکستان پیپلز پارٹی کے رہنما اور مشیر زراعت سندھ منظور وسان نے پیش گوئی کی ہے کہ عمران خان اسلام آباد جلسے میں استعفے کا اعلان کر سکتے ہیں۔
منظور وسان کا کہنا تھا کہ ملکی سیاست کے لیے دو تین دن بہت اہم اور مشکل ہیں، عمران خان کا دور ختم ہوچکا، اسمبلی میں انکی اکثریت نہیں رہی، اب ہرجگہ سےاپوزیشن کے حق میں فیصلے آرہے ہیں۔
مشیر زراعت سندھ نے کہا کہ عمران خان سے اپنے ہی لوگ دھوکاکر رہے ہیں اور ہمیں چھوڑ کر عمران خان کے پاس جانے والے واپس آرہے ہیں۔
گورنر راج سے متعلق ان کا کہنا تھا کہ عمران خان سندھ میں گورنر راج کی کوشش کریں گے مگر عمل نہیں ہوگا، کسی مائی کے لعل میں ہمت نہیں کہ سندھ میں گورنر راج لگائے۔
یاد رہے دو روز قبل منظور وسان نے 24مارچ کے بعد ق لیگ اور ایم کیو ایم کے حکومت سے الگ ہونے کی پیش گوئی کی تھی۔
ان کا کہنا تھا کہ عمران خان کا کھیل ختم ہوچکا ،حلوہ تیار ہے ، دیکھتے ہیں کھاتا کون ہے، قومی اسمبلی اجلاس میں تاخیر کا مقصدعمران خان نے شکست تسلیم کرلی ہے۔
.
