آسٹریلوی اداکارہ مارگوٹ روبی نے اب تک کے اپنے کیریئر میں ’ باربی‘ کے لیے سب سے زیادہ معاوضہ وصول کیا ہے جب کہ فلم نے دنیا بھر سے ایک ارب ڈالر سے زائد کی کمائی کرلی ہے۔
بڑی اسکرین پر باربی کا کردار نبھانے کے لیے مارگوٹ کو خطیر معاوضہ ادا کیا گیا ہے جو کہ تقریباً 19 ملین ڈالر کے قریب ہے، تاہم بات یہاں پر ختم نہیں ہوتی کیوں کہ فلم کی کامیابی کے بعد جو معاوضہ ان کے حصے میں آئے گا وہ شائقین کے ہوش اڑا دینے کے لیے کافی ہے۔
غیرملکی ویب سائٹ کی رپورٹ کے مطابق فلم کے باکس آفس پر تہلکہ مچانے کے بعد 32 سالہ آسٹریلوی اداکارہ کا معاضہ 77 ملین ڈالرز تک جا سکتا ہے۔
باربی جو کہ 220 ملین ڈالر کے بجٹ سے بنائی گئی ہے اس نے اپنی ریلیز کے محض دو ہفتے بعد ہی رواں ماہ کے آغاز میں عالمی باکس آفس پر ایک ارب ڈالرز سے زائد کا بزنس کرلیا تھا۔
فلم کی ہدایت کاری کے فرائض انجام دینے والی گیروگ پہلی خاتون ڈائریکٹر ہیں جن کی فلم نے ایک ارب ڈالرز کی کمائی کا سنگ میل عبور کرنے کا اعزاز حاصل کیا ہے، یہ ہی نہیں گیروگ نے نوح بومباخ کے ساتھ مل کر فلم کا اسکرین پلے بھی لکھا ہے۔
