لاہور : وزیراعلیٰ پنجاب مریم نوازشریف نے اے ایس پی سیدہ شہر بانو نقوی کو گلے لگا کر تھپکی دی اور شہر بانونقوی کو نوجوان افسروں کیلئے قابل تقلید قرار دے دیا۔
تفصیلات کے مطابق وزیراعلیٰ پنجاب مریم نوازشریف سے اے ایس پی سیدہ شہر بانو نقوی کی ملاقات ہوئی ،ملاقات میں مریم نواز نے اے ایس پی سیدہ شہر بانونقوی کو گلے لگایا اور تھپکی دی۔
اے ایس پی شہر بانو نے اچھرہ واقعےکی تفصیلات سے وزیراعلیٰ پنجاب کوآگاہ کیا، جس پر مریم نوازنے اچھرہ واقعہ میں جرات کا مظاہرہ کرنے پر اے ایس پی شہر بانو نقوی کو سراہا۔
وزیراعلیٰ پنجاب نے اے ایس پی شہر بانونقوی کو نوجوان افسروں کیلئے قابل تقلید قرار دیتے ہوئے کہا کہ شہر بانو نے نوجوان افسروں کیلئے بہادری ،جرأت کی مثال قائم کردی۔
ملاقات میں سینئرصوبائی وزیر مریم اورنگزیب،آئی جی پنجاب ،سی سی پی او لاہور، ایس ایس پی لاء اینڈآرڈر بھی موجود تھے۔
یاد رہے لاہور کے اچھرہ بازار میں ایک خاتون نے ایسا کرتا پہنا ہوا تھا جس پر عربی زبان میں کچھ حروف لکھے تھےجس کے بعد وہاں موجود لوگوں نے سمجھا کہ یہ کچھ مذہبی کلمات ہیں اور اس معاملے نے ایک غلط فہمی کو جنم دیا۔
اس پیچیدہ صورتحال کو خاتون اے ایس پی شہربانونقوی نے سنبھالا اور بہت بہادری سے خاتون کو مجمع سے نکالا اور اپنے ساتھ لے گئیں تھیں۔