لاہور: پاکستان مسلم لیگ ن کی مرکزی نائب صدر مریم نواز نے کہا ہے کہ استعفوں کے لیے ابھی باضابطہ طور پر نہیں کہا ہے لیکن پھر بھی گھر پر استعفوں کا انبار لگ چکا ہے۔
اے آر وائی نیوز کے مطابق لاہور جلسے سے قبل آج ایک ریلی سے خطاب میں مریم نواز کا کہنا تھا کہ منتخب نمائندوں سے 13 دسمبر کے بعد استعفے مانگوں گی، انشاء اللہ استعفے ان کے منہ پر ماریں گے، نواز شریف کے شیر آخری دم تک ساتھ کھڑے رہیں گے۔
واضح رہے کہ مریم نواز آج بھی لاہور کی سڑکوں پر رہیں، اور ریلیوں میں کارکنوں کی 13 دسمبر کے جلسے کی دعوت دی، انھوں نے کہا میں جلسے کے لیے آپ کو خود دعوت دینے آئی ہوں، ادھر تجزیہ کاروں کی رائے ہے کہ استعفوں کے مشن میں اپوزیشن مشکل کا شکار ہے، اور ن لیگ کو استعفے طلب کرنے کے لیے اب لاہور جلسے کا انتظار ہے۔
پی ڈی ایم جلسہ تھریٹ الرٹ، مریم نواز سمیت دیگر قیادت کو نشانہ بنایا جا سکتا ہے
مریم نواز نے کہا یہ کہتے ہیں کہ نواز شریف کی سیاست ختم ہوگئی ہے، دن رات کہتے تھے کہ این آر او نہیں دیں گے، لیکن پچھلے دو دن سے یہ ہاتھ جوڑ کر نواز شریف سے این آر او مانگ رہے ہیں، عوام کے ووٹ پر ڈاکا ڈالنے والوں کو این آر او نہیں ملے گا۔
انھوں نے کہا میاں صاحب نے کہا تھا میرے لاہوریوں کو جا کر جلسے کی دعوت دینا، میں آپ سب کی احسان مند ہوں، لاہور حکومتیں بناتا ہے اور گراتا بھی ہے، موجودہ حکومت لاہور نے نہیں بنائی اسے مسلط کیاگیا ہے پاکستان پر۔
انھوں نے کہا لاہور میں پی ڈی ایم کا آخری جلسہ ہے، لاہور میں آخری جلسہ اس لیے رکھا کیوں کہ جب لاہور بولتا ہے تو پاکستان سنتا ہے۔
